Кандаш пашадымылан – 10 вакансий
Марий Элын Паша да калыклан паша верым ситарыме департаментшын увертарымыж почеш, республикыштына пашадыме-влак шагалемыныт.
2017 ий январь-майыште регионысо калыклан паша верым ситарыме рӱдер-влакын учётыштышт 3276 еҥ шоген. Идалык ончыч тыгаяк жаплан 4311 пашадыме лийын.
Департаментын данныйже почеш, калыклан паша верым ситарыме рӱдерлаште пашадыме-шамычын чотышт 21 процентлан иземын. Таче кечылан 3729 еҥ келшыше пашам кычалеш.
Тений вич тылзе жапыште рӱдерыш полышым йодын толшо 2439 еҥлан паша верым мумо. Таче кечылан пашадыме кажне 8 еҥлан 10 вакансий уло.
М.ИВАНОВА.