Марий Элым вуйлатыше Александр Евстифеевын кӱштымыж почеш, «йошкар» зонышто пашам ыштыше медик ден социальный пашаеҥ-влакын йочаштлан «Журавушка» социально-реабилитационный рӱдерыште яра канаш йӧным ыштат.
Пунчал дене келшышын, у коронавирус инфекций шарлыме неле условийыште пашам ыштыше медик ден социальный обслуживанийын «петырыме» режиман стационар организацийлаштыже тыршыше пашаеҥ-влакын 7-17 ияш йочаштлан палемдыме рӱдерыште 14 кечаш специализироватлыме сменым организоватлат.
Социальный вияҥмаш министр Марина Островскаян мутшо почеш, йоча-влакым кечыште вич гана пукшаш, эм, витамин, кушкыл, массаж, физиопроцедур да физкультур дене эмлаш тӱҥалыт. Культур да веселаҥдыме мероприятий-шамычымат ямдылыме, но нуным изирак тӱшка дене эртарат. Шинчымаш программым педагог-влак тора гыч пуат.
У коронавирус инфекций шарлыме пагытыште рӱдерыште кызытеш сменыште 37 йоча веле тазалыкшым пеҥгыдемден кертеш. Тидын дене келшышын, идалык мучаш марте тушто 74 ӱдыр-рвезе каналтен шукта.
Рӱдерыш COVID-19 черым пуртымо деч сменыште каныше йоча ден пашам ыштыше-влак тазаҥдыме отделенийыш ик татыште пурат. Тылеч вара пашаеҥ-шамыч смене пытымеш организаций деч ӧрдыжкӧ огыт лек.
Таче кечылан, рашемден М.Островская, медик ден социальный пашаеҥ-влакын 134 йочашт «Журавушка» рӱдерыш канаш каяш кумылан улыт.
Медик ден медицине да социальный обслуживаний организаций-влакын пашаеҥышт ӱмбак пеш кугу нагрузко возын, нунын кокла гыч шукынжо ешыштым ужде илат, палемден А.Евстифеев да социальный вияҥмаш, тазалыкым аралыме, молодёжный политике, спорт да туризм, тыгак финанс министерстве-шамычлан врач ден моло медицине пашаеҥ-влаклан канаш йӧным ыштыме ешартыш йодышым ончаш кӱштен.
Марий Элым вуйлатышын организаций да
аналитике виктемжын уверже негызеш
М.ИВАНОВА
