Шукерте огыл командировко дене Шернур посёлкышто лийме годым физкультур да спорт рӱдерыш пурен лекна. Тушто мемнам кундемыште спортын икмыняр видшын поснак сайын вияҥмыж дене палдареныт.
Пӧлемыш пурен шогалмеке, шкафыште радам дене шогалтыме кубок-влак койыч. Тугеже сеҥымаш уло! Мӱндырнак огыл ече-роллер, баскетбол мече-влак шинчалан пернышт. Ик лукеш тӱрлӧ инвентарьым чумыреныт. Плакат, фото, пырдыжгазетат койыт… «Чылажымат шотыш кондат, пєлемым эрыктат, олмыкташ ямдылалтыт докан», – шоналтышым мыят. А шкеже ече-роллер кийыме верыш тарванышым, вет пытартыш жапыште ты вид нерген поснак шуко ойлаш тӱҥалыныт. Республикыштына икмыняр вере ече-роллерлан келшыше трассым ямдылат. Мутлан, Волжскышто, Йошкар-Ола воктенысе «Виктория» спорт клубын кумдыкыштыжо. Шернур кундемыште ече дене тренер В.Смоленцев дене палыме лийна. Мутланымашнат ты вид нерген рончалте.
– Чынжымак, кундемыштына спортын кумдан шарлыше ече видше сайын вияҥеш. Республик кўкшытан тӱрлӧ таҥасымаш эртаралтеш. Мутлан, ече дене Олимпиадын призёржо Нина Селюнина-Рочева ден тўнямбал кӱкшытан спорт мастер Валерий Исаевын призышт верч республик кӱкшытан таҥасымашым эртарымаш йўлаш пурен. Тушко эсогыл, пошкудо кундемла гычат спортсмен-шамыч куанен толыт. Ты вид дене районыштына куд спорт мастер уло. Нуным ончен, самырык-влак эшеат талын ямдылалтыт, – палымым ышта
В.Смоленцев. – Таче кечылан Настя Куклина, Сергей Паймеров, Сергей Максимов, Антон Соловьёв сай результатым ончыктат. Изирак улыт гынат, Диана Садовина, Регина Андреева, Дима Веткин, Артём Терентьев, Ваня Веселов ӱшаным ыштат. Адакшым вет стадионышто ече дене та‰асаш чапле корным ыштенна, искусственный курыкат келыштаралтын, пӱртӱсат моткоч ӧєрал…
Ече-роллер нерген ойлаш гын, ты видат куандараш тӱҥалын. Кызыт мемнан чылаже лу мужыр ече-роллер уло. Кажне кечын тренировкым эртарена. Лӱмын ыштыме корно уке, но кас велеш, транспорт шагалрак кудалыштме годым, асфальтыш лектына. Тидыже – ечызе-влаклан кугу шўкалтыш.
– Ече-роллер дене тренировкыштат, таҥасымаштат изиш лӱдыкшӧ, пеш писын сусыргаш лиеш, сандене аралтышат кӱлеш. Тидланат шагал огыл шийвундым луктын пыштыман? – йодде шым чыте мыят.
– Шлем, наколенник деч посна ок лий. Мутат уке, чылажат окса дене кылдалтын. Мутлан, тыглай ече-роллерже 3,5 тӱжем теҥгем шога гын, шлемлан ик тӱжемым луктын пыштыман. Ача-ава-влаклан тау, нуно полшат, – ойла Виталий Лаврентьевич.
Виталий Смоленцев ты районышто кумло ий утла тренерлан тырша. Моло вес видлан кумылаҥдыше тренер-шамыч дене икойыш шуын, пырля пашам ыштат, икте-весылан полшат. Кундемыштышт верысе калыклан спорт дене пеҥгыде кылым кучаш тӱрлӧ йӧным ыштат. Мутлан, стадионеш тренажёр-влакым келыштарыме. Тушко, кеч-могай жапыште толын, капкылым пеҥгыдемдаш, тӱрлє упражненийым ышташ лиеш. Вет стадионышто корныжым электротул волгалтара. Кеч йӱдвошт кошт, сандене верысе калык тыглай каналташат, яндар южым шўлалташат ты верыш толыт. Ты кундемыште шыже гыч тӱҥалын май марте ече дене 28 таҥасымаш эртаралтын. Нунын кокла гыч латкудытшо – республик кӱкшытан.
– Мый ече спортлан ответственный улам гын, теве эше мом ешарыме шуэш: тений изирак ӱдыр-рвезе-влак ече дене республикыште «Надежда» (ончыч «Пионерская правда» газетын призше верч) таҥасымаште ойыртемалтыныт да Первоуральскыште вийыштым тергеныт. Тыгай кӱкшытанышкыже йоча-влак дене икымше гана миенна. Ӧрдыж кундемыш лектын опыт погына. Молым ончалын, шкештат виянрак лийыт. Вес ганат ӧрдыж кундемыште таҥасаш корно почылтеш манын ӱшанена, – куанжым ок шылте тренер.
Теве чыла тидым ужын, тренер-влакын тыршымыштым ончен, результатыштлан куанаш гына кодеш. Пашам ыштет гын, лектыш садак лиеш. Эше иктым палемден кодымо шуэш. Шернур район ГТО-м сдатлыме дене посна площадкылан шотлалтеш. Такшым республикыштына куд районышто тыгай площадке ышталтын. Август кыдалне ГТО-м сдатлыше участник-влак кужу дистанцийыште вийыштым тергеныт гын, лишыл жапыште кумылан-шамыч спортын эше икмыняр видышкыже ушнат. А тидыже арам ок лий: иктылан тудо вий-куатым, ӱшаным пуа гын, весылан, вузлашке тунемаш пурашшонышылан, икмыняр очком ешара.
Е.ЭШКИНИНА.
Авторын фотожо.
