СПОРТ

Каналтат, таҥасат, сеҥымашке шуыт

Таза илыш-йӱла, таза капкыл да пӱсӧ уш-акыл эреак икымше верыште лийшаш улыт! Тидлан негызым мӧҥгыштӧ, школышто пыштат.

Волжский районысо Пєтъял кыдалаш школын тунемшыже-влак Анапыште всероссийский президент модмаште Марий Элын чапшым аралат. Нунын дене пырля физкультурым туныктышо А.Семёнов каен. Тений кеҥеж мучко, манаш лиеш, ӱдыр-рвезе-влак тиде финалыште участвоватлаш ямдылалтыныт. Нунылан Шем теҥыз воктене эртыше модмаште вийым тергаш, канаш келша. Тений шукыштым таҥасымашым торжественно почмаш куандарен.

– Такшым йоча-влак тыршат. Многоборьеште кок рвезе сайрак результатым ончыктен кертеш ыле, вучыдымын очком йомдарышт. Кандашле команде коклаште кандашымше верыш лекна. Умылаш лиеш: спорт – тиде спорт. Сандене тӱрлыжланат ямде лийман. Ял шотан илем команде-влак коклаште лу эн тале коклаш логалаш, манаш веле! Чылаштым мокталтыме веле шуэш. Тыршеныт. Мутлан, теорийым палыме шотышто мемнан-шамыч нылымше верыш лектыч, эстафетыште кандашымше лийыч, а творческий конкурсышто 41-ше вер дене палемдалтыч, – ойла Альберт Аркадьевич, – Туштыжо хореографын пашажат кӱлын. Икманаш, йоча-влак шкештым чыла велым шуаралтмыштым ончыктеныт.  

Тынарак команде ола шотан илем коклаште вийжым терга. Тушто Советский посёлкысо 1-ше №-ан школын тунемшыже-влак Марий Элын чапшым аралат.

Тений всероссийский президент модмаште элнан 80 субъектше гыч 1500 утла тунемше вийжым терга. Тушко регион кӱкшытыштӧ икымше верыш лекше-влак чумыргеныт.

Тыгай сынан модмаш 2011 ийыште стартым налын. Кажне ийын школ этапыште куд миллион утла йоча участвоватла.

Тений почётан уна семын баскетбол дене СССР-ын спорт мастерже, СССР-ын заслуженный тренерже, олимпийский чемпион Иван Едешко лийшаш.

Е.ЭШКИНИНА.

Снимкыште: Пӧтъял команде – шокшо кундемыште.

Опубликовать в Одноклассники

Добавить комментарий