13 июньым калыкыште имньым туарыше Еремейын кечыже семын палат. Ты кечын кресаньык шошо ага, шурным ӱдымӧ пашам мучашлен, пурсам, немычпурсам шынден. Эрдене шудыш вочшо лупсым ончен, эрлашыжым игече могай лийшашым мужедыныт.
13 июнь (изарня) – кушшо тылзе Скорпион шӱдыр палыште. Тиде – чапле лектышан шӱдыр пале (лышташ кече).
Пакчазын тылзе календарьже почеш таче теле шапашым ямдылаш киярым, томатым, шере ден кочо пурысым, баклажаным, пекин ковыштам, салатым, шпинатым пакчаш луктын шындаш келшыше кече.
Порей, батун, шнит шоган йыраҥым урыман. Кушкылыш вӱдым шаваш, емыж-саскам пуышо пакчасаскалан минеральный негызан ешартыш кочкышым пуыман, мландым пушкыдемдыман.
Икияш, шукияш да роза пеледышым шындаш келшыше жап.
Ты кече дене кылдалтше калык пале-влак:
- Нугыдо лупс возын – ояр кече лиеш.
- Кастене шудышто лупс уке – эрла йӱран игече лиеш.
- Лупс писын кошка – тугеже йӱрым вучыман.
- Кастене вочшо лупс чот вӱдыжгӧ – эрла тунар шокшо лийшаш.
- Еремей кечын йӱр йӱреш – кужу да йӱштӧ теле толеш.
- Тиде кечын эр ӱжара йошкарге – чапле кинде лектышлан ӱшаненыт.
- Куку кужун мура – эрлалан ояр да шокшо игечым мужедеш.
- Эрдене нугыдо тӱтыра – шыжым поҥго шуко лийшаш.
12 гыч 13-шо йӱдым ужмо омо огеш шукталт манын ойлат.
Таче шочшо еҥ кугу кӧргӧ вий-куатан да шканже гына ӱшанен илыше. Поро кумылан да кутыраш йӧратыше. Оксам кидыште пеҥгыдын кучен моштышо, родо-тукымжым пагалыше. Ончыко ужын илен моштышо.
Р.ЧЕПАКОВА
