УВЕР ЙОГЫН

Калык календарьым лышташлен

24 октябрь (изарня), Катлыше тылзе – Ӱдыр шӱдыр палыште. Тиде кокла лектышан пале (Вож кече).

Таче теплицыште мландым пушкыдемдаш, кӱнчаш, ураш, мульчироватлаш келшыше кече. Кушкылым шындаш, кусарен шындаш, пикироватлаш, компост орам чумыраш лиеш.

Тыгак шукияш пеледышым, розам, клематисым да декоративный моло кушкылым шындаш, кусарен шындаш йӧнан жап.

Нӧшмым лазырташ пышташ, кушкыл укшым пӱчкедаш, кӱчыкемдаш, шуэмдаш огеш темлат.

Садысе кушкыл вож йымак минеральный ден органический ӱяҥдышым шаваш, шукш-копшаҥге, тӱрлӧ чер авалтыме деч аярым шыжыкташ, шӱкшудым кораҥдаш келшыше кече.

Ончен куштымо пакчасаска ден вожсаскам кылмыкташ, вареньым, джемым шолташ, пакчасаскам мариноватлаш, ковыштам шинчалташ йӧнан кече. Но янда атыш оптымо шапашым калай петыртыш дене петыраш огеш темлалт.

Калыкыште ты кече Филипп кече семын палыме. Ожно лачшымак таче кече гыч вакшыш пырчым йоҥышташ коштыныт.

Ты кече дене кылдалтше моло калык пале:

  • Таче куатле покшым возын гын, вашке лум толеш.
  • Эрдене тӱтыра кужун шога – игече лывырта, ночко толеш.
  • Ночко мландыш вочшо лум ок шуло, теле деч вара шошо эр толшаш.
  • Филипп кечын лум лумеш – теле йӱштӧ лиеш.
  • Тылзе каваште шикш кокла гыч ончышо гай шапалгын коеш, ночкым вучо.
  • Пушеҥге лышташ-влак чот лыжгыктат, вашке лум толеш.
  • Йӱд кава ояр – игече палынак йӱкшемда.
  • Ур, коля, удыр кормам шуко ямдылаш тыршат – кужу да йӱштӧ телым вучыман.
  • Кудывечыш лукмо чыве мӧҥгеш вӱташке пураш, вуйжым шулдыр йымак тояш тӧча гын, лишыл кечылаште игече чот йӱкшемда.
  • Вольык шкенжым каньысырын, чытамсырын куча – лавыртыш лиеш.
  • Ты кечылан эҥер, ер йогын кылмен шуын гын, калык йӱлам жаплен, ий ӱмбак шогалыныт. Тыге ешыш окса перке толмылан ӱшаненыт.
  • Филипп кечылан йӱр йӱреш да мардеж эрвелым пуалеш – лавыран да ночко игече кужун шуйнаш тӱҥалеш.
  • Таче кече марте пушеҥгысе лышташ йоген пытен шуктен огыл гын, игече идалык мучко писын вашталташ тӱҥалеш.
Опубликовать в Одноклассники

Добавить комментарий