Мый 11-ше классыште тунемам. Тений иктешлыше сочиненийым возаш тӱҥалына. Тудо кунам эрта да темыже-влак могай лийыт?
ГЕННАДИЙ.
Шернур район.
Йодышлан Марий Элын Образований да науко министерствыжын пресс-службыштыжо вашештеныт:
– Тений выпускник-влак иктешлыше сочиненийым 5 декабрьыште возат. Чылаже вич темым ямдылыме: «Ача-ава ден икшыве», «Шонымаш ден чын илыш», «Ӱчым шуктымаш ден поро кумыл», «Сымыктыш ден ремесло», «Порылык ден осал койыш».
Тыгак 6 февральыште шапаш кече лиеш. Тунам декабрьыште сочинений дене уда отметкым налше-шамыч возен кертыт. А 8 майыште школым икмыняр ий ончыч тунем пытарыше-шамычлан иктешлыше сочиненийым сераш йӧн уло.
Л.ШАБДАРОВА.