Коронавирус чер лӱдыкшӧ шарлымылан кӧра «Творцы и хранители» еш-тукым фольклор ансамбль-влакын регион-влак кокласе III-шо фестивальышт тений икымше гана йӧршеш вес семын — онлайн йӧн дене – эртен.
Санденак кумылан-влак шке мастарлыкыштым сценыште огыл, а видеоматериалым ямдылен колтен ончыктеныт.
Ты гана фестивальыш 270 еҥ, Марий Элысе 10 район гыч – тиде Волжский, Морко, Оршанке, Шернур, У Торъял, Юрино, Кужэҥер, Параньга, Советский, Килемар районла, тыгак Башкорстостанысе 7 район, эшежым Чуваший, Татарстан, Киров область, эсогыл Саратов ола гыч – чылаже 35 еш коллектив ушненыт.
Участник-шамычын пашаштым ныл номинаций дене акленыт. Тыгодым «Эн сай еш фольклор ансамбль» номинацийыште жюри эше кок категорийлан шелын аклен — тиде «Еш-тукым фольклор коллектив» да «Тӱвыра да каныме учреждений-влакын творческий группышт».
Фестивальыште I-ше степенян диплом дене теве кӧмыт палемдалтыныт:
«Еш-тукым фольклор коллектив» номинацийыште «Еш йӱла» категорийыштыже — Чуваший гыч «Камал» («Радушие») еш ансамбль;
тиде номинацийыштак «Мурымо мастарлык» категорийыште Шернур район гыч «Шумавий» еш ансамбль (Мустай тӱвыра пӧрт);
«Творческий коллектив» номинацийын «Йӱла-влак» категорийыштыже — Волжский районысо Упшер тӱвыра пӧртын коллективше;
«Мурымо мастарлык» категорийыште – «Собор» калык фольклор ансамбль (Саратов);
«Декоративно-прикладной творчествыште эн сай еш-тукым» номинацийыште — Воронцовмыт династий (Шернур район Тамшэҥер ял);
«Детки и предки» эн сай фотовыставке» номинацийыште — Калугинмыт еш (Киров область);
«Эн сай национальный кухньо» номинацийыште жюри тӱрлӧ кундемла гыч чыла 12 участникым лауреат лӱм дене палемдаш мутланен келшен.
Л.КАМАЛЕТДИНОВА
