27 май гыч 9 июньышто Марий Элыште «Макулатурым пого — пушеҥгым утаре» экомарафон эрта.
Тудым «Подари дерево» краудфандингпроект (www.подари-дерево.рф) увертарен. Адресше тыгай: Марий Элын Пӱртӱс поянлык, экологий да калыкым аралыме шотышто министерствыже проектым сайлан шотлен да тушко республикысе тунемме учреждений, мер организаций, предприятий, ола да ял шотан илем-влакым ушнаш йодын. Акций район да ола-влак коклаште таҥасымаш семын эрта. Тӱҥ задачыже — калыкнам пӱртӱс поянлыкым аралаш да тудым аныклен кучылташ кумылаҥдаш. Сеҥышыш лекше-шамычым тауштымаш да шергакан пӧлек вучат.
Акцийыш ушнышо-влак ик верыште 300 килограмм марте тошто кагазым погышаш улыт. Вара проектын сайтыштыже йодмашым кодыман.
Посна еҥ-влак акцийыш ушнен огыт керт гынат, макулатурым поген, илыме але паша, тунемме верыштышт вуйлатыше-влак деке йодмаш дене лекшаш улыт.
Акций мучашлалтмеке, регионын ужар рейтингшым ыштат. Макулатурым наҥгаяш йодмашым тыгак www.сдай-бумагу.рф сайтыш пуыман. Марий Элыште оргкомитетын телефонжо тыгай: 8-937-301-26-83, электрон почто — 12@sdai-bumagu.com
Сеҥшыш лекше-влаклан (100 тонн деч утларак макулатурым погымылан) тыгай приз лиеш:
1 верлан (ойырен налаш лиеш):
— Шуэн вашлиялтше 10 озым пушеҥге (манчжур пӱкш, тумо, туйо);
— Библиотек фондым пойдараш 30 книга;
— телескоп.
2-шо верлан:
- ЭкоКинофестиваль — экологий дене кылдалтше видеоформат;
- Библиотек фондым пойдараш 25 книга;
- Цифровой микроскоп.
3-шо верлан:
- Уремысе спортивный комплекс (турник, брус, тошкалтыш). Призер-влак уремым шке ойырен налыт.
- Библиотек фондым пойдараш 20 книга;
- Леготехник.
С.Носова
