КУЛЬТУР ДА ИСКУССТВО

Кажне мурыжо кумылым нӧлта, илаш вийым ешара

Мурышо да семӱзгарым шоктышо «Шуматкече» ансамбльым марий тӱняште  палыдыме еҥже укеат, очыни. Теве 15 ноябрьыште М.Шкетан лӱмеш Марий национальный драме театрыште  эртаралтше концертыш мийымеке, тидым шкеак ужын да шижын кертна. Ты ганат тудо лӱмгече пайремышкыже зал тич калыкым чумырен.

Концертыш толшо-влак эртыше курымын 90-ше ийлаште возымым веле огыл, у муро-влакымат шокшо кидсовыш дене вашлийыныт. Сылне муро, сем почеш кушталтыде кузе чытет? Ты ганат артист-влак дене пырля зал калык мурен, куштен, вет «Шуматкечын» кажне мурыжо чоныш логалеш, кумылым нӧлта, илаш вийым ешара.

«Шуматкечым» кумло ияш лӱмгече пайремже дене республикын тӱвыра, савыктыш да калык паша шотышто министрын алмаштышыже Михаил Матвеев, Кугыжаныш Погын вуйлатышын алмаштышыже, В.М.Васильев лӱмеш Йылмым, сылнымутым да историйым шымлыше марий институтын директоржо, Йошкар-Олаште Морко калыкын вашполыш ушемжым вуйлатыше Евгений Кузьмин, Кугыжаныш Погын депутат, Марий тӱвыра рӱдер вуйлатыше Наталья Пушкина, Морко район администраций вуйлатышын алмаштышыже Алексей Васильев  саламленыт да артист-влаклан кужу жап усталык пашаште тыршымыштлан, марий музыкальный искусствым вияҥдымашке да марий мурым калык коклашке шарымыштлан  Чап кагазым, Тауштымашан серышым кучыктеныт.

Кызыт ансамбльыште кандашын улыт. Игорь Борисов, Валерий Петров, Алексей Алексеев, Анатолий Алексеев, Руслан Никифоров, Александр Алексеев уста улмышт дене ойыртемалтыт: мурым возат, семӱзгарым шоктат, мурат. А Елена Григорьева (Гурьянова) ден Надежда Богданова олыкысо пеледыш семын коллективым сылнештарат веле огыл, яндар йӱкышт да мастарлыкышт дене калыкым куандарат. А тидым ышташ кажныжлан моткоч келша, вет нуно ансамбльын ончычсо вуйлатышыже Евгений Соколовым тачат порын шарнат да тудын тӱҥал кодымо пашажым чон йодмо семын уло кумылын шуктат.

— Мемнан ансамбльнам кызытат поро йолташна Евгений Соколов вуйлата. Тудын возен кодымо кажне мурыжо мыланна лишыл да калыкат порын вашлиеш. Тудо – эреак пеленна, — палемдышт коллективын участникше-влак.

— Пеленна. Тудо нигунам огеш мондалт. Женян уке лиймыж деч вара концертыш икымше гана толынам. Коллективын мурымыжлан, сылне семым шоктымыжлан куанен шинчем, но куанже ойган, — палемдыш Е.Соколовын Алевтина шӱжарже.

— Женя изинекак муро шӱлышан кушкын. Тудо проста, пашаче кумылан, чаткалыкым, арулыкым йӧратыше лийын. Кудывечыштыже ма пӧртыштыжӧ нимо уто лимйын огыл. Кеч-могай пашамат ышташ полшаш мия ыле.  — шарналта Евгенийын тукым акаже Валентина Степанова. — Женян Светик ӱдыржат ачаж гаяк чолга. Тудо кызыт икымше классыште тунемеш, Чавайн, Колумб лудмашке ушнен, сеҥыше радамыш лектын.

— Концертыште Женян мурыжым колам да шкежат шинчамлан коеш. Уло родо-тукымжо погынен, тудлан ӱдырым налаш кайыме ушышкем толын пурыш. Тунам теле моткоч луман ыле, садлан сӱан деч ончыч кудывече гыч лумым шуко шупшынна, — палемдыш вес тукым акаже Глафира Руфова. — Женя поро кумылан, унам ончен моштышо лийын. Кызыт мурыжым колыштын, пырля улмо жапнам шарналтена да пеленна улмыж гаяк чучеш. 

30 ий жапыште «Шуматкече» ансамбль вияҥын, чапланен. Тудын кажне мурыжо, семсавыртышыже  шӱмым пырткаш тарата, шочмо кундемыш, изи годсо жапыш пӧртылта, икымше йӧратымашым, йыр улшо пӱртӱсым, воктен улшо еҥым йӧраташ ӱжеш. Арам огыл ты коллектив эше 1993 ийыштак калык лӱм дене палемдалтын.

Тек ончыкыжымат ты коллектив вияҥеш да репертуаржым у муро дене пойдара.   

Алевтина БАЙКОВА.

А.Титовын фотожо 

Опубликовать в Одноклассники

Добавить комментарий