УВЕР ЙОГЫН

Кажне кечын – уым да оҥайым

16 октябрьыште Правительстве пӧртыштӧ Козьмодемьянскысе «Паллада» парус клубын ойыртемалтше воспитанникше-влакым шарнымашан медаль дене палемденыт, а клублан Марий Элын флагшым кучыктеныт.

Самырык моряк-влакым Марий Эл вуйлатыше А.Евсифеев лӱм дене правительстве председательын икымше алмаштышыже С.Сметанин саламлен. Тудо тыгак таче кечылан республикыште военно-патриотический йодышлан кугу тӱткышым ойырымо нерген ойлен. «150 военно-патриотический объединений ден отряд-влак пашам ыштат. Тушко 5 тӱжем утла йоча ушнен, а патриотический пашан эше ик кӱлешан ужашыжлан таче кечылан йоча теҥыз движений шотлалтеш. Тидыже Козьмодемьянскыште ышталтын да моткоч сайын вияҥеш», – манын тудо.

Тыгак парус клубын воспитанникше-шамычын ик гана веле огыл мўндыр походыш лекмыштым, паша опытыштым, нелым сеҥен лекмыштым палемден. «Самырык гынат, те тукымын геройжо улыда, вет неле условиян испытанийым эртенда да эреак Марий Элын чапшым араленда», – ойлен  С.Сметанин. Моряк-влакым шокшын саламлен, профессионализмыштым аклен, наградым кучыктен. «Участники военного парада» шарнымашан  медальым Иван Вороновлан, Кирилл Матвеевлан, Артём Кирпичниковлан, Максим Яндыковлан, «За службу Родине с детства. Нахимов.П» шарнымашан медальым Артём Желудкинлан, Максим Мучкинлан, Иван Сергеевлан, Лев Утятинлан пуэныт.

«Паллада» тунемме-парус судно дене кругосветный плаванийыште лийше Роман Михеевлан Марий Элын кугыжаныш флагшым кучыктеныт. Лач тиде флаг дене конкурсым эртыше йоча-влак лишыл жапыште «Паллада» парус фрегат дене кругосветный путешествийыш тарванат.

– Тиде мемнан икымше наградына, сандене ӱшандам сулаш тыршена. Ме, Марий Элын юнгыжо-шамыч, Кугу Отечесественный сарыште сеҥыше-влакын тукымышт улына. Геройна-влакым шарнена, нунын йўлаштым шуена, патыр, иза-шольо кылым аралаш тӱҥалына. Шке историйна, элна дене кугешнена, ӱшанлын служитлаш ямдылалтына, – ойлен моряк-влак лӱм дене Артём Желудкин.

Палаш: «Паллада» парус клуб 2011 ий гыч пашам ышта. Таче кечылан тушто Козьмодемьянск, тыгак Курыкмарий ден Юрино районла гыч 100 тунемше  шотлалтеш. Йоча-шамыч ик гана веле огыл Севастопольышто эртыше Сеҥымаш Парадыште участвоватленыт. Тыгак «Артек» йоча лагерьыште президент грантын сеҥышыже лийыныт. А ик тыгай сеҥымаш деч вара «Святой Косьма» стругым чоҥеныт. Тудын дене мӱндыр походыштат лийын шуктеныт.

«Паллада» клубын вуйлатышыже Андрей Желудкинын палемдымыж почеш, воспитанникше-влак кажне кече уым да оҥайым  пален налыт.

Е.ЭШКИНИНА. 

Опубликовать в Одноклассники

Добавить комментарий