16 майыште Марий комсомол организацийым ыштымылан 100 ий теме. Лӱмгечым Йошкар-Оласе Ленин лӱмеш тӱвыра полатыште торжественно палемдышт. Кажне район гыч делегаций толын ыле. Шке жапыштыже комсомол радамыште шогышо еҥ-влак кызыт ийготым погеныт гынат, тачат чолгак лийын кодыт. Кажныже комсомол радамыште, тунамсе илыш пӧрдемыште шолмо пагытым кумыл нӧлтын шарналта. Лӱмгечылан пӧлеклалтше торжественный мероприятий деч ончыч комсомол ветеран-влак Сеҥымаш паркыште вашлийыныт, сандене нунын дене мутым вашталташ да «Могай эн сай шарнымашым комсомол коден!» манын йодаш йӧн лийын.
Леонид Конаков, Марий Элын сулло, Российын почётан строительже, кызыт сулен налме канышыште:
- Мыйын таче костюмыш пижыктыме комсомол значокем школ годсак. 1962 ийыште тудын радамышкыже пуренам. Мыланем вожатый семын тунам 6-шо классым кучыктен пуэныт. Могай гына пашам ыштен огынал: макулатурым, металлоломым погенна, походлаш коштынна… Пеш весела жап семын гына шарналтем.
Анатолий Рыбаков, Шернур районысо Шӱдымарий школ директор:
– Армий деч вара мыйым Шернур районысо «Восход» колхозын комсомол секретарьжылан шогалтеныт. Шӱдымарий клубышто вокально- инструментальный ансамльым чумыренна, верысе футбол клубым почынна, пеҥгыде шартышан корным ыштенна… Кугу суаплан ял калыкым спортлан шӱмаҥдымым шотлем. Каныш кече еда тӱрлӧ таҥасымашым эртаренна. Тушко уло ял калык ушна ыле.
Виктор Соловьев, академик, философий науко доктор:
— 1949 ий гычак комсомолыш пуренам. Таче марте ок колто тудо мыйым шкеж деч. Армийыште, институтышто комсорг лийынам. Варажым ныл ий комсомол обкомышто лектор гурппым вуйлатенам. Комсомол радамыште тунам 28 ий марте лийме. Тиде эн сылне пагыт семын шарналт кодын.
Раиса Арсентьевна Шихалеева, Марий Турек район:
— Шке жапыштыже мый комсомол райкомын кокымышо серетарьжылан куд ий ыштенам. Тудо пагытыште ме эн передовой шонымаш-влакым илышыш шындаренна, социально-значимый пашам шуко шуктенна. Кеч политикыште, кеч паша аланыште лач комсомол эре эн ончылно каен. Кажне кечыже шарнаш кодшо лийын.
— Владимир Мальцев, «Марийская правда» газетын ончычсо тӱҥ редакторжо, кызыт сулен налме канышыште:
— ВЛКСМ-н 50 ияш лӱмгечыжлан мый Москваште демонстрацийыште лийынам. Тунам мый Москосо кугыжаныш университетын кокымшо курсыштыжо тунемынам. Трибунышто Леонид Брежневым ужынам. Ялысе тыглай рвезылан тиде кугу шарнымашым коден. А кызыт мый марий комсомолын лӱмгечыжлан пӧлеклалтше «Красной нитью прошитое время» книгам кок ий наре чумырымо пашаште тыршенам.
Чуваший ден Палестиннын келшен илыме фондшын президентше, Азий ден Африкысе калык-влак дене келшен илыме да пашам пырля ыштыме Российысе комитетын Чуваш представительствыжым вуйлатыше Аль-Балуи Бассам Фатхи:
— Шке жапыштыже комсомол кузе вияҥмым шке шинча дене ужынам. Тунам Мосвасе Права академийыште тунемынам. Ятыр йолташем комсомолец лийыныт, Чуваший гыч пелашем денат комсомол радамыште палыме лийынам. Тачат чылашт дене кылым кучем. Ужынам, кузе комсомолец-влак Египетыште плотинам чоҥеныт, Азий ден Африкыште тыглай калыкын правшт верч шогеныт… Шкежат комсомол дене пырля кушкынам. Мый Марий Элыш эре кугу кумыл дене толын коштам. Марий комсомолын вияҥмыж нерген икмыняр гана кинофильмымат войзена. Тачат ты пайремыш толде кертын омыл.
С.Носова мутланен.
М.Скобелевын фотожо
