Роспотребнадзорын Марий Элысе виктемжын общественный приёмныйыштыжо республикнан эн изи гражданже-влак Йӱштӧ Кугызалан серышым возен колтен кертыт.
Ачан але аван специалист дене мутланымышт жапыште йочалан у ий юзо кугызалан серышым шке кид дене возаш йӧн уло. Вараже нине письмам, икте кодде, элнан тӱҥ Йӱштӧ Кугызажлан Великий Устюг олашке (Вологодский область) колтат. А икшывылан кумылжо шукталтмым гына вучаш кодеш.
Палемдыме общественный приёмный тыгай адрес дене верланен: Йошкар-Ола, Машиностроитель урем, 121-ше пӧрт, 112-шо кабинет. Виктем 9 гыч 18 шагат марте пашам ышта, кугарнян – 16.45 шагат йотке, 12 гыч 12.45 шагат марте – кечывал каныш. Акций 25 декабрь марте кая.
М.ИВАНОВА
