Йошкар-Ола гыч – Чувашийыш
Йошкар-Олаште «Звезды детства» йоча творчестве фестивальын региональный этапше эртен. Тушто Марий Эл Республикыште тӱҥ федеральный инспектор Александр Ситников лийын.
Фестивальыште Ийготыш шудымо-влаклан Волжскысо социально-реабилитационный, «Журавушка» рӱдер-влакын, Савинысе йоча интернат-пӧртын, ача-аван полышышт деч посна кодшо да тулык икшыве-влаклан Лӱльпанысе да Волжскысо рӱдер-влакын, Октябрьскийысе школ-интернатын воспитанникышт-влак, чылаже 52 еҥ, «вокал», «куштымаш», «художественный мут» да «оригинальный жанр» номинацийлаште мастарлыкыштым ончыктеныт.
Икымше номинацийыште эн сай номерлан ача-ава полыш деч посна кодшо да тулык икшыве-влаклан Волжскысо рӱдерын воспитанницыже Арина Аканаеван йоҥгалтарыме «Мамины глаза» мурыжым шотленыт.
«Куштымаш» номинацийыште Октябрьский школ-интернатыште кушшо йоча-влак сеҥеныт. Нуно марий куштымашым ончыктеныт.
«Оригинальный жанр» номинацийыште тиде школ гычак Илья Елесин акробатический номерже дене икымше верыш лектын.
Лӱльпанысе рӱдер гыч Иван Ивлечев «художественное слово» номинацийыште почеламутым сылнын лудмыж дене ойыртемалтын.
Нине сеҥыше-влак лишыл жапыште, 10-11 июньышто, Чуваш Республикыште эртышаш окружной фестивальыште таҥасаш тӱҥалыт.
Л.Камалетдинова.
