Мемнан землякна, композитор, фронтовик, СССР Кугыжаныш да Ленинский премий лауреат, СССР-ын калык артистше Андрей Яковлевич Эшпайлан памятникым Йошкар-Оласе ик скверыште (тудыжо Машиностроитель уремыште, Красноармейский ден Свердлов уремла коклаште) шогалтыме нерген газетыштына возенна ыле. Тиде вер шотышто республикыштына илыше да культур, искусство аланыште тыршыше-влак коклаште шукыштым тургыжландара да шонаш тарата.
Кодшо кечылаште редакцийышкына Марий Элын калык артистше Вячеслав Созонов толын ыле да шке шонымашыжым каласыш.
— Андрей Яковлевичлан памятникым Амстердам набережныйыште вераҥдаш да тиде кумдыкым Эшпай лӱм дене лӱмдаш, а Рембрандт олмеш Андрей Эшпайын памятникшым шогалташ темлем. Андрей Яковлевич марий тӱвыраште, искусствышто эн кугу верым налеш, вет тудо — СССР-ын калык артистше. Тиде верыштак Усталык ушем-влакын пӧртышт верланен, тораштак огыл Яков Эшпай лӱмеш Марий кугыжаныш филармонийын у полатше чоҥалтеш. Садлан Эшпайлан памятникым тушко шогалташ вер лач келшен толеш. Адакшым республикнан рӱдолашкыже толшо турист-шамычат эреак Какшан сер воктене коштыт да памятник шотышто умылтараш куштылго лиеш.
Весе. Эшпайын возымо мурыштыжо тыгай корно-влак улыт:
«Йошкар-Ола, я вижу вновь
Над весенней Кокшагой мосты…»
Памятникым тушко шогалтат гын, шола велыш ончалмеке, ик кӱвырым ужаш лиеш, а пурлаште – кокытым. А Рембрандтым вес верыш кораҥдаш лиеш.
Андрей Эшпай Юл эҥер воктене шочын, сандене памятникшым вӱд воктеке вераҥдыме лачеш толеш.
А.БАЙКОВА
