УВЕР ЙОГЫН

Йошкар-Олаште «Йоча пагыт фестиваль» эртен

31 августышто Йошкар-Оласе Йоча да самырык-влакын усталык полатыштышт  «Йоча пагыт фестиваль» эртен. 

Тудо Российыште икшыве-влаклан ешартыш образованийым пуымо кугыжаныш системым ыштымылан 100 ий теммылан пӧлеклалтын. Фестивальым почмо дене саламлаш Марий Элын образований да науко министрже Н.Адамова, моло ведомствын пашаеҥже-шамыч миеныт.

Фестиваль моткоч поро шӱлышан лийын. Тӱҥалтыште делегаций-влакын парадышт эртен. Аниматор-шамыч ӱдыр-рвезе-влакым куштыктеныт. Районласе ешартыш образованийым пуышо тӧнежлаште пашам ыштыше-влак икшыве-влаклан тӱрлӧ мастер-классым эртареныт. Меат икмыняр кидпашам ыштен ончышна. Бисер, тӱрлӧ тӱсан кагаз, клей полшымо дене пеледышым, мераҥым, шкешотан маскым ямдылышна. Полат ончылно вераҥдыме ик ӱстелат яра лийын огыл. Кажныж йыр йоча-шамыч шукын погыненыт. Чылаштынат иктаж оҥай модышым ыштымышт шуын.

Спортлан кумылан-влак баскетбол дене модыныт. А спектакльым ончаш йӧратыше-шамычлан уремыште постановкым ончыктеныт. Тушко йоча-влак шкештат ушненыт. Полат кӧргыштӧ тӱрлӧ кружокыш, секцийыш возалташ йӧн лийын. Пайрем кужун шуйнен, ӱдыр-рвезе-влак мӧҥгышт каяш вашкен огытыл, вет кеҥежын пытартыш кечыж дене  тыге ойыртемалтшын чеверласаш моткоч оҥай лийын.

Л.ШАБДАРОВА.

Авторын фотожо.

Опубликовать в Одноклассники

Добавить комментарий