УВЕР ЙОГЫН

Йошкар-Оласе сӱан шергыш шуэш

Марий рӱдолана угыч Россий кӱкшытыштӧ ойыртемалтын.

Йодыштмаш почеш шымлымашым эртарыше «СберИндекс» службын специалистше-влакын увертарымышт почеш, 250 тӱжем утла еҥ илыман Российысе 75 ола коклаште марий рӱдолаштына сӱанлан ик эн шуко оксам кучылташ ямде улыт. Ты шотышто Йошкар-Ола 10 эн тыгай ола радамыш логалын да шымше лийын. Санкт-Петербург, Москва да Озаҥат почеш каят. Кокла шот дене  Йошкар-Олаште ушнышо мужыр-влак сӱан йӱлам эртараш 217 тӱжем теҥгем кучылтыт, Москваште шагалрак – 196 тӱжем теҥгем.

Йодыштмаш почеш, эн поян сӱаным Набережные Челны олаште эртарат, кокла шот дене 225 тӱжем теҥгем пытарат. Эн аныкан сӱан-влак Чита олаште эртат –106 тӱжем теҥгеш шуэш.

Йодыштмо еҥ-влак кокла гыч 4,5 процентше тений сӱаным эртараш кумылым ончыктен. Кокла шот дене налаш гын, нуно тидлан 188 тӱжем теҥгем кучылташ ямде улыт. Тидын годым эн сай сӱан пӧлеклан оксамак шотлат.

Эн сайжым ойырат

Марий Элыште «Туризм индустрий профессийыште эн сай» конкурс увертаралтын.

Сеҥышыш лекше-влак регионын чапшым Россий кӱкшытыштӧ аралаш тӱҥалыт. Конкурсыш ушнаш шонышо-влак шке профессийышт дене кум ий деч шагал огыл пашам ыштышаш улыт. Тыгай номинаций/подноминаций темлалтыт:

«Унагудышто але моло вере вашлийме да вераҥдыме шотышто эн сай пашаеҥ»;

«Республикыш толын да ӧрдыжко лектын коштмо туризм шотышто эн сай менеджер». Подноминаций-влак: «Йоча да самырык-влак туризм шотышто  менеджер», «Доступный туризм шотышто специалист».

«Эн сай экскурсовод (гид)». Подноминаций – «Гид-кусарыше»;

«Номер фондым эксплуатироватлыме службын эн сай специалистше (горничный)».

Документым 11 май марте Молодежный политике, спорт да туризм министерствыш намийыман але mari-tourism@mail.ru. электрон адресыш колтыман. Конкурсын положенийже дене министерствын сайтыштыже палыме лияш йӧн уло.

С.Носова

Опубликовать в Одноклассники

Добавить комментарий