Йошкар-Оласе аэропортым угыч пашаш колтымаште икымше ошкыл ышталтеш. Тидын нерген Марий Элын Промышленность, транспорт да корно озанлык министерствыже увертара.
Марий Элын правительствыжын полышыжлан кӧра предприятийыште федеральный кӱкшытан аэропорт-влаклан темлыме йодмаш-шамычым шукташ тӱҥалыныт. Министерствыште пален налме почеш, тылеч ончыч Марий Элын правительствыжын кӱштымашыж почеш аэропортым республик кӱкшытан гыч федеральныйыш кусареныт да … петыреныт. Федеральный кӱкшытан авиаузел статусым налаш тышан видеоэскерыше камерылам шындылман, самолет чоҥештен кӱзымӧ да волен шичме корным уэмдыман, эше икмыняр пашам шуктыман.
Чыла ты пашам ыштымеке, авиаперевозчик-влакым кычалаш да нунын дене кутыраш тӱҥалаш лиеш. Марий Элым вуйлатыше Александр Евстифеевын ик гана веле огыл палемдымыж почеш, эн ончыч Москвашке да Российын кечывалвелкыже, тидын шотыштак Крымыш, авиарейс-влак почылтыт.
Аэропортын парышыже талукышто 80 миллион теҥге деч шагал лийшаш огыл. Лач тынар окса предприятийын чыла роскотшым петыраш кӱлеш. Ушештарена: Йошкар-Ола дене авиакыл келшыше авиаперевозчикым мудымылан кӧра кок ий ончыч кӱрылтын.
А.АНДРЕЕВ
