Астрономий храмын пӱрымашыже лишыл жапыште рашемшаш: Марий Эл Республикым вуйлатыше А.Евстифеев Тӱвыра да каныме рӱдӧ парк кумдыкышто эше 2007 ийыштак чоҥаш тӱҥалме планетарийын зданийжым ончен савырнен.
Тунам объектын заказчикше Марий Эл Республик правительствын Капитальный чоҥымаш виктемже лийын, но подрядчикын пашаже негызым оптымо йыжыҥыште мучашлалтын. 2008 ийыште кугыжаныш заказчикын сомылжым регионысо Образований да науко министерствылан кусареныт, но тудо финансирований укелан кӧра чоҥымо пашам чарен шогалтен.
Таче планетарийын площадкыже шучкын коеш: объектым кӱлмӧ семын консервироватлыме огыл, а йырже улшо 35 сотык кумдыкышто тӱрлӧ вондер ден пушеҥге кушкын шогалыныт.
«Кугыжаныш пого министерствын чоҥен шуктыдымо тиде объектым муниципальный собственностьыш кусарыме радамже оҥай. Умылем, мыланна планетарийым республикын юбилейжылан чоҥен шуктен кертше инвестор кӱлеш», – Йошкар-Олан мэрже Е.Масловлан да Кугыжаныш пого министерствын еҥже-влаклан манын А.Евстифеев.
Кугыжаныш пого министрын алмаштышыже А.Плотниковын мутшо почеш, чоҥен шуктыдымо объектым Образований да науко министерстве деч Йошкар-Олан собственностьышкыжо кусарат, варажым тудын ончыкылык пӱрымашыжым мэрий рашемда.
Е.Маслов йоча рӱдерыште планетарий деч посна эше икмыняр кинозал, икшыве-влакын чолган каныме кумдыкышт лиймым, тыгак чоҥымо пашам мучашке шукташ кокла шот дене 1,5 ий кӱлмым, тыгодым инвесторлан 200 миллион теҥгем шке средстваж гыч пышташ логалмым умылтарен.
Мучашлан Александр Евстифеев виян инвестор-влак дене чарныде пашам ышташ темлен.
М.ИВАНОВА.
