Начар тазалыкан йоча ден подростко-влаклан палемдалтше Йошкар-Оласе реабилитаций рӱдерлан 25 ий темын.
Шочмо кечыж дене саламлаш тӧнежыш Марий Элын социальный вияҥмаш министрже О.Федорова, рӱдерын ветеранже ден воспитанникше, шинчымашым пуымо моло организацийын еҥже-влак, тыгак йоча-шамычын ача-авашт миеныт.
Юбиляр лӱмеш шуко поро мут йоҥгалтын. Шке саламлымаштыже Ольга Викторовна рӱдерын ойыртемалтше йоча-влакын тазалыкыштым пеҥгыдемдыме шотышто кугу опытшым палемден, тыгак тӧнежын пашаеҥже-влаклан поро пашам шуктымыштлан, усталыкыштлан, ӱдыр-рвезе-влакым социально аралыме пашаште эре уым кычалмыштлан тауштен.
Чырык курым жапыште рӱдерыште комплексный реабилитацийым церебральный паралич, эҥертыме-тарванылме аппаратын ситыдымашыже, психикын пужлымыж дене орланыше, начарын мутланыше 18 ияш марте 500 наре ӱдыр-рвезе эртен. Тӧнежын реабилитаций услугыж дене пайдаланыше-влак ий еда ешаралтыт. Специалист-влакын тыршымышт дене йоча-влак сай велыш вашталтыт, шкан ӱшанаш, ала-мом уым пален налаш тунемыт, шкеныштым таза икшыве семынак шижыт. Нунылан реабилитаций рӱдер кокымшо пӧрт гай. Тыште эре полшат. Йоча-влаклан веле огыл, ача-ава-шамычланат.
Таче ойыртемалтше йоча-шамычлан мер илышыш ушнаш, усталыкым вияҥдаш педагог-психолог, логопед, туныктышо-дефектолог, социальный педагог гай специалист-шамыч полшат. Шке пашаштышт нуно кызытсе жаплан келшыше компьютер тренажёрым, сенсор модмашым, тактильный, колмо да ужмо стимуляторым кучылтыт.
Директор Екатерина Карташован палемдымыж почеш, тӧнежын 10 пашаеҥже рӱдерым почмо икымше кече гычак пашам ышта, кандаш еҥ – 15 ий утла.
М.ИВАНОВА
