«Республикыште эпидемиологий сӱрет начарештмылан кӧра каныме да тазалыкым пеҥгыдемдыме лагерь-влак пашам ыштымым огыт чарне?»
Л.Васильева,
Медведево район
2021 ий 15 июнь марте Марий Элыште у коронавирус инфекций шарлыме ваштареш оперативный штабын кундемыштына йоча-влакын каныме лагерьыштым петырыме дене кылдалтше решенийже лийын огыл.
Марий Элыште Роспотребнадзор виктем исполнительный, верысе кучемлашке темлымаш-влакым колтен. Нунын дене келшышын, каныме да тазалыкым пеҥгыдемдыме йоча лагерьлаште инфекций ваштареш профилактикым ыштыме пашам вияҥдыман. Тыгодым икшыве-шамыч дене тыршыше-влак деч кажне тылзын анализым налшаш улыт. Лагерь гыч смене мучаш марте иктат нигушкат кайышаш огыл, йӱлаш пурышылан шотлалтше «Ача-ава кече-влакымат» эртараш чарыме.
Республикыште каныме да тазалыкым пеҥгыдемдыме чыла йоча лагерь пашам ышта. Кешбэк дене кылдалтше программат илышыш пурталтеш.
Г.КОЖЕВНИКОВА
