КУЛЬТУР ДА ИСКУССТВО

Йот элыштат Эшпайым палат

11-13 мартыште Йошкар-Олаште самырык музыкант-влаклан А.Я.Эшпай лӱмеш  фестиваль-конкурс эртен.

Мемнан землякна, композитор, СССР-ын калык артистше Андрей Эшпайын лӱмжӧ тӱня мучко чапланен. Тыгай фестиваль-конкурсым эртараш Андрей Яковлевичынак шонымашыже лийын, сандене икымшышкыже шкежат  толын да кушкын толшо тукымым колыштын. Тений тудо тӱнямбал кӱкшытанышкат шуын. Участник-влак Российысе тӱрлӧ ола гыч веле огыл, Эквадор, Узбекистан, Белоруссий гычат толыныт.

Конкурсым торжественно почмаште И.Палантай лӱмеш тӱвыра да сымыктыш колледжын А.Эшпай лӱмеш кугу концерт залыштыже Саратов областьысе Юл кундем муниципальный оркестр шоктен. Концерт программым жюри председатель, Озаҥ оласе Н.Г.Жиганов лӱмеш кугыжаныш консерваторийын профессоржо, Татарстан да Марий Эл искусствын сулло деятельже Александр Маклыгин Андрей Эшпайын музыкшо дене почын. Зал калык тудым шокшо кидсовыш дене вашлийын.

Кум кече жапыште участник-влак ныл номинацийыште: «Фортепиано», «Оркестрысе струнан семӱзгар-влак», «Оркестрысе духовой семӱзгар-влак», «Композиций» мастарлыкым ончыктеныт. Нуным жюри аклен. Жюриште Андрей Эшпайын уныкаже, пианист, Мария Андреевна Эшпай лийын.

Фестиваль-конкурсым иктешлымеке, гран-прим Н.Г.Жиганов лӱмеш кугыжаныш консерваторийын студентше Дарья Васильева сеҥен налын. А Андрей Эшпайын произведенийжым эн сайын шоктышо семын Санкт-Петербургысо Н.А.Римский-Корсаков лӱмеш кугыжаныш консерваторийын тунемшыже Дарья Коробова ойыртемалтын.

А.Байкова.

Опубликовать в Одноклассники

Добавить комментарий