ЙӰЛА МАРИЙ ЙӰЛА

Йолжо койо Шорыкйолын…

Шорыкйол арня эртен кайыш. Акрет марий йӱлам монден огынал, тачат эртарена. Кече ден йӱдын телым ик тураште шогымышт деч вара маска шке вынемыштыже ик вел гыч весыш савырнен возеш, тудо лач ты пагытлан логалеш маныт.  Шорыкйол пайрем тений Рошто кечын У ий кож воктене Ленин лӱмеш площадьыштат эртыш.

 Республикысе Марий тӱвыра рӱдерын ямдылыме театрализоватлыме представленийышкыже калык шуко погынен ыле. Нунын деке Васликугыза ден  Васликува унала толыныт. Мо оҥайже: тений нунылан полшаш йолташ-шамычат лектыныт. Оршанке районысо Упшо села гыч лӱмын латкок мӧчӧр Йошкар-Олаш толыныт. Нуно сценыште веле огыл, у ий кож воктенысе калык деке воленыт, поро тыланымаштым ойленыт, мужедаш, модаш, веселитлаш полшеныт. Шкеныштын ойлымышт почеш, Упшо ялыште Шорыкйолым кажне ийын лач тыге веселан эртарат.

А сценыште тиде жапыште «Чон оҥгыр», «Мурпеледыш», Ший полан» фольклор коллектив-влак шке мастарлыкыштым ончыктеныт. Марий  мурызо-влак С.Осипова, А.Егошин, Р.Данилова, С.Яндукова, бард Г.Григорьев, «Кас сем» вокальный группо да молат пайрем кумылым нӧлтеныт.

Каласен кодыман, тений Шорыкйол пайремым Башкортостаныште, Татарстаныште, Удмуртийыште илыше марий-шамычат кумдан эртареныт.

 С.НОСОВА

М.Скобелевын фотожо

Опубликовать в Одноклассники

Добавить комментарий