Шукерте огыл ательешке пиджакым ургаш пуэнам. Куэмжымат шкак налын намиенам. Ямде вургемым налме годым шинчашкем пиджакын подкладыштыже утюг дене йӱлалтыме палым ужын шуктенам. Мый ургымо услугылан да материалым локтылмылан оксам пӧртылташ йодынам. Но ателье пашаеҥ-влак мыланем локтылмо материалын акшым гына пӧртылтеныт, ургымо пашалан тидым ышташ тореш лийыныт. Закон почеш нуно чын ыштеныт мо?
В.Павлова.
Йошкар-Ола.
Йодышлан Роспотребнадзорын Марий Элысе управленийын пресс- службыштыжо вашештеныт:
— Тендан ситуацийыште ателье пашаеҥ-влак чын ыштен огытыл. «Потребитель-влакын праваштым аралыме нерген» Федеральный Законын 35-ше статьяже дене келшышын, йодмыда почеш пашам шуктышо тендан намийыме материалым сайын аралымылан да кучылталтмыланат мутым куча. Намийыме куэмым локтылмылан ателье кум кече жапыште тыгаяк качестван вес куэм дене вашталтышаш да кумылда почеш пиджакым урген пуышаш. Но тыгай качестван материалжым ателье ок му гын, локтылмо материалын да роскотын ак кугытшым кок пачаш кугемден пӧртылтышаш.
С.Носова ямдылен.
