Марий Элыште блокадниклан шотлалтше мыняр еҥ ила? Нуно могай пенсийым налыт?
Е.Тихонова.
Йошкар-Ола.
Йодышлан Россий Пенсий фондын Марий Элысе пӧлкаштыже тыге вашештышт:
– Кодшо ийын Марий Элыште «Жителю блокадного Ленинграда» знак дене палемдалтше 23 еҥ илен, тений 1 январьлан 20 блокадник кодын. Тиде чот гыч 13 еҥже Йошкар-Олаште ила, нылытше – Волжскышто, Курыкмарий, Медведево да Кужэҥер районлаште – икте дене.
Закон дене келшышын, тиде категорийыш пурышо граждан-влак кок пенсийым налын кертыт: шоҥгылык шотышто страховой пенсийым да инвалидность шотышто кугыжаныш пенсийым. Таче кечылан блокадник-шамычын кок пенсийышт кокла шот дене 27538 теҥгеш погына, тышечын кокымшыжо – 7929 теҥге кугыт.
Федеральный льготник семын нунын тылзе еда тӱлыман окса выплатым налаш да социальный услугым пуымо набор дене пайдаланаш правашт уло. Февральыште «Жителю блокадного Ленинграда» знак дене палемдалтше-влакын тылзе еда тӱлыман окса выплатыштым 5,4 процентлан кӱзыктымӧ, да тудо 2850 теҥгеат 26 ыр лийын.
