Общероссийский калык фронтын Марий Элысе штабшын заседанийыштыже чолга еҥ-влак профильный министерствылам вуйлатыше-шамыч дене пырля национальный проект-влак кышкарыште социальный объектлам чоҥымо мониторингын иктешлымашыжым каҥашеныт. «Фронтовик-влак» правительствын еҥже-шамыч деч тыгай сынан южо объектым чоҥымо пашам шуйкалыме шотышто лекше йодышым рашемдаш, нине ситыдымашым кӱчык жапыште кораҥдаш йодыныт.
Мутлан, ОНФ-ын еҥже-влак Йошкар-Олаште 49-ше №-ан йочасадыш пристройым чоҥымо пашам шуйкалыме шотышто тургыжланат. «Демографий» национальный проект кышкарыште нӧлталтше тиде объектым ноябрьыште сдатлаш палемдыме.
Образований да науко министр Наталья Адамован умылтарымыж почеш, пашан акше шотышто эртарыме экспертизе дене кылдалтше проблемылан кӧра объектым чоҥымо пашалан оксам колтымым чарныме, но йочасадым республиканский адресный программе кышкарыште чоҥен шуктат да идалык мучаште сдатлат.
Общественник-влак «Лӱдыкшыдымӧ да сай качестван автомобиль корно» кышкарыште олмыктымо корно шотышто лекше ситыдымаш-влакымат палемденыт, поснак Шойбулак – Цибикнур – Тумер корным чоҥымо темым тарватеныт. Пашам июньыштак тӱҥалме, но тудо у асфальтым шарыме марте эшеат шуын огыл.
Транспорт да корно озанлык министрын обязанностьшым жаплан шуктышо Александр Желонкинын каласкалымыж почеш, тиде ситыдымаш шотдымо подрядчик дене кылдалтын. Техникын да материалын ситыдымыштлан кӧра ончылгоч палемдыме пашан кугытшо график деч почеш кодеш. «Марийскавтодор» ГКУ кугыжаныш заказчик контрактым шӧраш лийын. Тидын шумлык подрядный организаций тудым судыш пуэн, да кудыжо чын – тачат рашемден огыт керт. А.Желонкинын мутшо почеш, тений тиде корным телым кудал эрташ лийме марте шотыш кондат, а шушаш ийын участкым региональный программе почеш олмыктат.
«Национальный проект кышкарыште чоҥымо чыла объектын состоянийже шотышто чын сӱретым тылзе еда ыштена. Таче икмынярже нерген гына мутым лукна, но тиде мемнан тетла йодышна уке манмым ок ончыкто. Мониторингым умбакыже шуена, тудын иктешлымашыжым кучемын еҥже-влаклан калыкын шушаш ийлан темлымашыже переченьыште ончыктена», – манеш ОНФ-ын Марий Элысе штабшын сопредседательже Александр Кузнецов.
М.ИВАНОВА
