СПОРТ

Имне спорт вес верыш кусна

Лишыл жапыште имне спорт школ «Чудо-кони» йоча-юношеский комплексыш кусна.

Кызыт тушто спорт оборудованийым, всадник-влакын тренировкылан да таҥасымашлан йӧрышӧ экипировкым, 25 имньылан келыштарыме ӱзгарым, турнирлык барьерым, ялозанлык техникым, имньым ашнаш кучылтмо препарат ден кочкышым вес вере наҥгаят.

«Чудо-кони» имне спорт базе Медведево район Кугу Шаплак ялыште верланен. Тушто ты вид дене тренировкым, таҥасымашым эртараш тӱрлӧ кӱлешан йӧн дене келыштаралтын. Мутлан, олимпийскийыш пурышо имне спортын ик видше, конкур дене («А» ден «С» тӱшкаште чаракым сеҥен лекмаште), тӱнямбал кӱкшытан йоча таҥасымашат эртаралтын. Ты спорт объектын кумдыкыштыжо 3 манеж уремыште да икмынярыже леведыш йымалне келыштарыме улыт. Чыла манежыште шартышыже Европа кӱкшытан стандартлан келшен толшо. Имньылан душ, солярий, куржталме дорожко, канаш лукмо вер йӧнештаралтыныт. Тыгак спортсмен-влаклан каныме, вургемым вашталтен чийыме, кочмо верла, душ, актовый зал улыт. Тренировко сборым эртарашат йӧн ышталтын.

Имне спортым вияҥден колташлан ончыкшылан «Чудо» АНОДО-што тыгай задачым шындыме:

– имне спортлан шукырак еҥым кумылаҥдаш;

– квалифицированный спортсмен-влакым кушташ;

– физкультур да спорт мероприятийлам эртараш;

– тунемме-тренировочный сборым эртараш;

– тӱрлӧ мастер-классым, туныктымо семинарым организоватлаш;

– калыкыште имне спортым вияҥдаш, еҥ-влакым таза илыш-йӱлалан кумылаҥдаш.

Е.ЭШКИНИНА

Опубликовать в Одноклассники

Добавить комментарий