Таче мутна Советский район Кельмаксола школышто физкультурым туныктышо Евгений Марков нерген. Тудо кодшо тылзе мучаште 65 ияш лӱмгечыжым палемден. Шке жапыштыже уста туныктышын лӱмжӧ Марий Элыште гына огыл, Российыштат кумдан йоҥгалтын. Туныктымо аланыште 40 ий пашам ышта.
Евгений Юрьевич 1997 ий апрельыште «Урок деч вара спорт ден физкультурно-тазаҥдыме формым кучылтшо педагогический пашан мастарже» всероссийский конкурсышто икымше верым налын. 2006 ийыште «Образований» национальный приоритетный проект кышкарыште лийше «Российын эн сай туныктышыжо» конкурсышто ойыртемалтын. Тиде ийынак Россий Федерацийын образованийын сулло пашаеҥже лӱмым налын. Телымсе многоборье ден спорт мастерыш кандидат, вольный кучедалмаш дене республикын чемпионжо.
Шомак шомак дене, но кеч-могай пашам шке шинча денак ужаш кӱлеш. Мыланем Евгений Юрьевичын урокым ойыртемалтшын эртарымыжым ужаш пиал шыргыжалын. Сандене физкультурым туныктышем тудын гай чулым, писе да шке пашажым йӧратыше лиеш ыле гын, мый шкежат спортсмен лиям ыле очыни. Тиде чынжымак тыгак. Спортзалыште перемене жапыштат ӱдыр-рвезе-влакын юарлыме йӱкышт шокта, урок деч варат йоча-шамыч мӧнгышт куржаш огыттырше, а вигак Евгений Юрьевич деке вашкат.
Евгений Марковым педагог-новатор манаш лиеш. Тудын ямдылыме «Ик кечымат физкультур дечын посна» программыже моткочак ойыртемалтше да шкешотан. Тиде программым тазалык шагат, спортын да тазалыкын фестивальышт, школысо тазалык урок илышыш шыҥдараш полшат. «Тачысе школышто тазалыкым аралыме физкультурно-тазаҥдыме технологийым пуртымо» темылан пӧлеклалтше шымлымашымат возен. Евгений Юрьевич тунемшыже-влаклан физкультурын кӱлешлыкше нерген кажне урокышто умылтара, урокым яндар южышто шукырак эртараш тырша.
Арам огыл тиде пӧръеҥым школысо физкультурын «докторжо» маныт, молан манаш гын пӧръеҥ шке предметшым моткоч сайын пала да пашажым чоным пыштен ышта. Опытшо нерген ик гана веле огыл тӱрлӧ конференций ден курслаште каласкален. Мутлан, 2003 ийыште Нижний Новгородышто «Педагогике пашан мастарже» всероссийский конкурсышто. Марий образований институтын квалификацийым нӧлтымӧ курслаште, 2006 ийыште Йошкар-Олаште эртыше «Таза илыш-йӱлам кучымаш – тачысе илышын йогынжо» регион-влак кокласе шанче-практике конференцийыште, ача-ава-влакын «Тазалыкын гармонийже воспитатлыме задаче семын» республикысе конференцийыштышт.
– Оршанке педколледжым тунем пытарымеке, Советский район Ӱшнур школыш пашам ышташ толынам. Тунам тушто изирак пу спортзал ден уремыште спорт площадке лийыныт. Вара хоккей коробкам ыштыме. Икмыняр теле йоча-шамыч тушто коньки дене мунчалтеныт, хоккей денат модыныт.
Жап эртымеке, районысо образований пӧлка ДЮСШ-м вуйлаташ ӱшанен. Тыге Советский посёлкыш илаш куснаш логале. Школым кум ий вуйлатенам, но чонем ялысе школыш шупшын. Кельмаксола школыш пашам ышташ кайышым, кызыт марте тушто тыршем. 1988 ийыште Марий пединститутым заочно тунем пытаренам.
Эртыше илыш корнем ончалам да тыршымем арам лийын огыл манын шоналтем. Тунемшем-влак лӱмлӧ спортсмен лийыныт, спорт мастер дене спортыш кандидат-влак, мыйын семын физкультурым туныктышын корныжым ойырен налшат шукын улыт. Тугеже мый пиалан улам манын кертам. Но илышыште тӧрсырат вашлиялтын, туге гынат вуем ом саке, садлан Гётен шомакшым каласынем:«Илынет гын, тӱрлӧ нелылыкым сеҥен мошто!» – манын Е.Марков.
Ме редакций лӱм дене Евгений Юрьевичым лӱмгечыж дене шокшын саламлена. Тазалыкым, пиалым, пашаштыже тӱвыргӧ лектышым тыланена!
Л. ШАБДАРОВА.
(Фотом еш альбом гыч налме.)
