Волжский район «Москва» ООО-што август мучаште лиймына годым сай кече шогымылан кӧра чыла пасушто паша шолын. Шурнывечыште але кормам ямдылымаште, пырчым але ковыштам пасу гыч шупшыктымаште кугу паша механизатор ден водитель-влаклан логалын. Озанлыкыште нунылан чӱдылык ок шижалт, ик техникат яра ок шого.
Теве илалше механизатор Виталий Платонов дене пасушто тракторжо дене пытартыш силос «курыкым» таптен петырымаште вашлийна. Тений озанлыкын вольыкшылан нӧрӧ кормам ямдылымаште тудо шагал огыл вийым пыштен.
Механизатор-влак радамыш самырык рвезе-шамыч ушнат. Армий гыч толын, трактор руль воктеке шичшат улыт. Озанлык гыч лектын кудалме годым Корамас ял воктенсе ковышта пасу гыч лекше «Беларусь» тракторым ужна. Кабиныште кок самырык механизатор – Владимир Иванов ден Михаил Костин – шинченыт. Нуно тележкыш оптымо ковыштам озанлыкын конторыж деке наҥгаен шукташ вашкеныт. Туштыжо нуным чаплын шочшо ты пакчасаскам налаш толшо кугу фура вучен. Пасу гыч вигак тора кундемыш ужалаш колтат.
А.АНДРЕЕВ.