5 октябрьыште, Туныктышын тӱнямбал кечынже, Марий Эл Образований да науко министерствыште кундемнан ик эн виян педагогшо-влакым торжественно саламленыт.
Туныктышо-шамычлан регионым вуйлатыше Александр Евстифеевын саламлымашыжым Марий Эл правительстве председательын икымше алмаштышыже Михаил Васютин лудын. Тудо эше ик гана айдемын илышыштыже педагогын кугу рольжо нерген палемден, ты профессийын кӱлешлыкше нерген ойлен. Михаил Зиновьевичын мутшым республикын образований да науко министрже Наталья Адамова умбакыже шуен, погынышо-влаклан поро мутым каласен.
Тиде кечын «Марий Эл Республикысе образованийын сулло пашаеҥже» лӱм дене кум еҥым палемденыт. Нунын лӱмышт – Морко район администрацийын образований пӧлкажым вуйлатыше Владимир Кирчанов, ты районыштак Унчо школышто марий йылмым да литературым туныктышо Римма Петрова (снимкыште) да «Марий чодыра озанлык техникум» кугыжаныш образовательный тӧнежын пӧлкажым вуйлатыше Валентина Шипицына.
Марий Эл правительствын Чап грамотыж дене палемдалтыныт: Олег Иванов (Волжский районысо Сотнур школын туныктышыжо), Наталья Кошелева (Строительно-промышленный колледжым вуйлатышын алмаштышыже), Людмила Мансурова (Экономико-правовой гимназийым вуйлатыше), Жанна Мосунова (Шуко профилян лицей-интернатын туныктышыжо), Андрей Сушенцов (образований да науко министерствыште проект-аналитике да организаций пӧлкам вуйлатыше).
Кажне ийын республикын ик эн виян вич туныктышыжым окса премий (тудын кугытшо – 200 тӱжем теҥге) дене палемдат. Тиде гана тудым Екатерина Березиналан (Бауман лицей), Екатерина Лапыгиналан (Политехнический лицей-интернат), Гульнара Мазиновалан (Волжск оласе лицей), Галина Фаттаховалан (Марий Турек кыдалаш школ), Янина Царегородцевалан (Йошкар-Оласе Т.И.Александрова лумеш 11-ше №-ан лицей) пуэныт.
Тыгак ты кечын математикым, физикым да информатикым туныктышо 14 педагогым ПС СОФТ IT-компаний-влак ассоциаций деч именной премий дене кумылаҥденыт.
Г.КОЖЕВНИКОВА
