Эрлашыжым, 15 февральыште, Сочиште Марий Эл вуйлатыше Александр Евстифеев республикын инвестиций йӧнжым кугемдышашлан ойпидыш-влакым подписатлен.
Александр Евстифеев, Российысе юрист-влак ассоциацийын правлений председательже Владимир Груздев да «Росконгресс» фондын директоржо Александр Стуглев вашкыл шотышто соглашенийыш кидпалыштым пыштеныт. Тыгак промышленный комплексын инновационный вияҥмашыжлан да приоритетный проект-влакым илышыш шыҥдарышашлан моткоч кӱлешан ошкыл семын Александр Евстифеев ден ВТБ-н президентын алмаштышыже-правленийын председательже Денис Бортниковын вашкыл шотышто ойпидышым ыштымыштым шотлыман. Ончыкыжым тудо республикыште экономический, инвестиционный да социальный политике шотышто кылым, изи да кокла кугытан предпринимательствым вияҥдаш полшышаш.
— Ӱшанем, тиде вашкыл экономике велым банкланат, республикланат пайдале лиеш, — палемден Александр Евстифеев.
Денис Бортниковын шонымыж почеш, кызыт Марий Эл – инвестицийлан да деловой партнерствым кумдаҥдышашлан Юл кундем федеральный округышто сай базан ик эн писын вияҥше регион.
Л.Камалетдинова.
