РФ Президентын Юл кундем федеральный округысо полномочный представительже Игорь Комаров Марий Элын рӱдолаштыже паша совещанийым эртарен. Тушто Россий Президентын Элым 2024 ий марте вияҥдыме стратегический задаче-влак нерген указшын тӱҥ положенийже-шамычын шукталтмышт дене кылдалтше йодышлам лончылымо.
Тений 29 ноябрьыште элнан Президентше 2019-2021 ий-влаклан федеральный бюджет нерген законым пеҥгыдемден. Тушто Российын субъектше-влаклан национальный проект-шамычым илышыш пурташышт федеральный бюджет гыч бюджет-влак кокласе трансфертым ойырымо нерген ойлалтеш. 2019 ийыште тудын кугытшо 400 млрд. наре теҥгеш шуэш. Тышечын124 млрд. теҥгеже Юл кундем федеральный округысо регион-влаклан федеральный полыш шотеш ойыралтеш, 5 млрд.теҥгем Марий Эллан палемдыме.
«Ойырымо оксам принципиально да профессионально кучылташ кӱлеш. Палемдыме задаче-влакым шукташлан ресурс ден средстван кугытыштым ончылгоч рашемдаш шотлан толеш. Тыгак кучем ден муниципалитет орган-влаклан роскотышто эн ончычак ыштышаш пашам палемдаш кӱлеш. Совещаний кышкарыште социально-экономический вияҥмаш дене кылдалтше утларак кӱлешан йодыш-влакым ончена, эн ончычак – тазалыкым аралыме, шинчымашым пуымо, илыме сфер, экологий, траспорт инфраструктур теме-влакым. Марий Эллан тений 14 декабрь марте федеральный проект-влакын ужашлашкыже пуртышаш региональный проект-шамычым ямдылаш, каҥашаш да пеҥгыдемдаш задачым шындыме», – манын Игорь Комаров.
Марий Эл Республикым вуйлатыше Александр Евстифеев совещанийын участникше-шамычым саламлен да Игорь Комаровлан регионланна Федераций Советыште Субъект-влакын кечыштым сайын эртараш, Марий Элыште национальный проект-шамычым илышыш пуртымо дене кылдалтше пашам организоватлаш полшымыжлан тауштен.
«Мемнан ончылан шындыме задаче-влакым шукташ Марий Эл Республикым вуйлатыше пелен Стратегический вияҥмаш, проект паша шотышто советым ыштыме. Тудлан национальный проект ден программе-влакым пеҥгыдемдыме да нунын шукталтмыштым эскерыме пашам ӱшаныме», – манын А.Евстифеев.
Нацпроект-влакын паспортышт дене келшышын, Марий Эл 56 федеральный проектыште участвоватлаш тӱҥалеш. Нуным илышыш пуртышашлан 2019-2024 ийлаште 54 млрд. теҥгем кучылташ палемден, тышечын 41,1 млрд. теҥгежым – федеральный бюджет гыч.
«Тиде пеш кугу суммо, республикнан кок бюджетше наре. Мемнан задачына – тиде средстван кажне теҥгежым ончыланна шындыме цельыш колташ», – ешарен регионым вуйлатыше.
А.Евстифеевын мутшо почеш, 2019-2024 ийласе финансированийын кугурак ужашыже 8 национальный проектын кышкарыштыже палемдыме мероприятийлам шукташ кучылталтеш: «Лӱдыкшыдымӧ да качестван автомобиль корнылан» – 16,3 млрд. теҥгем, «Здравоохраненийлан» – 13,5 млрд. теҥгем, «Демографийлан» – 6,3 млрд. теҥгем, «Илыме вер да оласе средалан» – 5,5 млрд. теҥгем, «Образованийлан» – 3,8 млрд. теҥгем, «Экологийлан» – 3,4 млрд.теҥгем, «Цифровой экономикылан» – 2,4 млрд. теҥгем, тыгак «Изи да кокла предпринимательствылан да амалкалче-влакын тӱҥалтышыштлан полышлан» – 1,2 млрд. теҥгем.
«Региональный проект-влакын теве тыгай показательышт ден пеҥгыдемдыме паспортышт Россий Федераций Правительствын проект офисышкыже да Россий Федерацийын федеральный органлашкыже палемдыме жапыште миен шуыт. Нуным 2019 ий январь гыч илышыш пурташ тӱҥалына», – рашемден Александр Евстифеев.
Марий Эл Республик вуйлатышын организаций да аналитике виктемжын уверже негызеш М.ИВАНОВА ямдылен.
