21 августышто Набережные Челны олаште финн-угор калык-влакын «Ме ик пушеҥгын укшлаже улына» VII фестивальышт эртен. Марий Эл гыч тушко Яков Эшпай лӱмеш Марий кугыжаныш филармонийын «Эреҥер» калык муро ансамбльже миен.
Мероприятий «Финн-угор калык-влакын тӱвыра поянлыкышт» ончер гыч тӱҥалын. Тушто Марий Эл, Удмуртий, Мордовий Республикла гыч кондымо этнографий материалым 5 ноябрь марте ужаш лиеш. Тыгак участник-влак йыргешке ӱстел йыр погыненыт. Мутланымашын тӱҥ темыже – кузе тӱвырам арален кодаш да вияҥден колташ.
Пайрем концертым тӱрлӧ усталык коллектив-влак сӧрастареныт. Нунын коклаште «Йоҥгалт, гармонь йӱк» гармоньчо ансамбль, «Лай мардеж» (Казань), «Мари сем» (Набережные Челны). Уна-влаклан тӱрлӧ ончерым, мастер-клссым ямдыленыт. Калык кочкышым сийлен ончаш темленыт, модыктеныт.
О.МОШКИНА
