УВЕР ЙОГЫН

Ик ола гыч гына – 30 утла вуйшиймаш

Общероссийский калык фронтын Марий Элысе региональный отделенийышкыже  кок арня жапыште эртыше «шокшо линийыш» Волжск олаште илыше-влак деч 30 утла вуйшиймаш пурен.

Еҥ-влак тротурла, корныла, машинам шогалтыме верла, пӧрт воктенысе кумдыкла гыч лумым сайын огыл кораҥдымылан ӧпке мутым ойленыт. Тыгак нуно оласе коммунал службо-влакын чот луман игечылан ямде огыл улмыштым палемденыт. Пытартыш кечылаште шогышо тыгай игече тидым тӱрыс пеҥгыдемден.

Социальный учреждений-влак воктечат лумым кӱлеш семын огыл эрыктымылан вуйшиймаш-влак йоҥгеныт. Еҥ-шамыч 19-ше номеран йочасад, 2-шо номеран школ деке лишемаш неле лиймым палемденыт.

— Еҥ-влакын вуйшиймашыштым муниципал кучемлашке нуным писын рашемдышашлан колтымо. Ончыкыжым оласе уремла ден корным эрыктыме шотышто ешартыш мере-влак ышталтыт манын ӱшанена, — каласен ОНФ рӱдерын Марий Элыште оласе средам тӱзатыме мониторинг шотышто координаторжо Валентин Севастьянов.

Ушештарена, ОНФ-ын «Лум фронт» акцийже Российысе чыла регионлаште эртаралтеш. Тудо луман да йӱран жапыште оласе корно ден инфраструктур-влакын, поснак социальный объект-влак воктене могай улмыштым тергаш шонен илышыш пурталтын.

Л.Камалетдинова.

Опубликовать в Одноклассники

Добавить комментарий