Кучемыште Марий Эл - 100

Ик ойыш шуын моштыман

21 сентябрьыште Марий Эл вуйлатыше Александр Евстифеев Йошкар-Олаште Киров-Строитель-влак уремлам ушышо корно кузе чоҥалтмым ончаш миен.

«Марийскавтодор» акционер ушемын генеральный директоржо Евгений Козыревын палдарымыж почеш, Ленин проспект деч чоҥалтше кӱвар марте ужаш корныш асфальтобетоным шарыме. Кызыт инженерный сеть-влакым угыч ыштат.

«Мостремстрой» организаций дене мутланен келшыме: идалык мучаш марте пролетный строений манмым монтироватлен шуктышаш улыт, каласен Евгений Козырев.

Чоҥымо пашам ыштыме дене пырля ончыч кызыт гараж-влакымат пужат. Йошкар-Олан мэрже Евгений Масловын ойлымыж почеш, нунын озашт кокла гыч чылашт дене гаяк мутланен келшен кертыныт. Але марте 118 гаражым ронченыт. Тышеч 15 пытартыш сутка жапыште.

Октябрь кыдал марте ме гараж-влакым тӱҥ шотышто пужен пытарена. 9 гараж шотышто нелылык уло. Нунын кокла гыч кумытшо шотышто решенийым мумо. Тиде пашам тений мучашлаш манын, чыла ыштена, каласен Евгений Маслов.

Марий Эл вуйлатыше гараж оза-влак дене ик ойыш шуаш кӱлеш да чылажымат улшо законодательстве дене келшышын ыштыман манын палемден.

«Йошкар-Олаште Киров урем ден Строитель-влак уремлам ушышо магистраль корным чоҥымаш» проектын икымше йыжыҥжым илышыш пурташ 2,3 млрд. теҥге ойыралтшаш. Тиде паша «Лӱдыкшыдымӧ сай качестван корно» нацпроект дене келшышын шукталтеш.

Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен.

 

Опубликовать в Одноклассники

Добавить комментарий