Марий Элын Тазалыкым аралыме министерствыжын 6 июль эрдене увертарымыж почеш, пытартыш суткаште республикнан инфекционный стационарлаж гыч 20 пациентым мӧҥгӧ колтымо, тыгодымак 39 черлым эмлалташ пыштыме. Тыге, теҥгече регионын 8 инфекционный стационарыштыже чылаже 607 еҥ киен. Тиде чот гыч 221 еҥлан «COVID-19» диагнозым шындыме, 159 черле неле состоянийыште лийын, 12 пациент шодым искусственно вентилироватлыме йӧн дене шӱлен, 246 еҥлан кислород кӱлын. Эн шуко черле, 224 еҥ, Йошкар-Оласе больницыште эмлалтын, Волжск оласе рӱдӧ больницыште 116 пациент киен, Медведево районысо рӱдӧ больницыште 88 еҥ медицине полышым налын. Йоча республиканской клинический больницыште 12 икшыве эмлалтын, 1 йоча неле состоянийыште лийын, нылытлан «у коронавирус инфекций» диагнозым шындыме.
«ВКонтакте» социальный сетьысе «Коронавирус. Марий Элын оперативный штабше» сообществын данныйже почеш, 6 июльышто у коронавирус инфекций дене черланыме эше 28 у случайым регистрироватлыме, да тиде чотын 3128 марте шумыжым пеҥгыдемдыме. Чылаже 24 черле колен.
М.ИВАНОВА
