Вашке ужалымашке у руш-марий кутырыктыш лектеш. Тудыжо тыглай огыл, а 3d. Авторжо – кидпаша мастар, этнодизайнер Евгения Кошкина.
Марий йылмым тунемаш шонышылан тиде кутырыктыш пеш пайдале лиеш. 80 открыткыште рушла да марла мут-влакым сӱрет дене сылнештарыме. Телефонлан лӱмын келыштарыме «MariMut» приложений гоч ты открыткым ончалыда гын, тудо «ылыжеш». Приложенийжым Play Market-ыште муаш лиеш. Мут-влакым йӱкаҥдыме. Ты пашам Евгениян шӱжарже, тыгаяк тале кидмастар Олеся Кошкина шуктен.
«Кеч-могай тӱҥалтыште ешемлан эҥертем. Тидын гана у саскам «шочыкташ» эргым ден шӱжарем полшеныт. Эргым IT-технологийым сайын пала. Тудо Юл кундем кугыжаныш технологий университетыште икымше курсышто программистлан шинчымашым пога. Кутырыктышым ямдылаш шонымашем улмо нерген пален налмеке, разработчик лияш келшен.
Марий Элыште 3d кутырыктыш але марте лийын огыл гын, вес кундемыште ты технологий дене ончычак пайдаланаш тӱҥалыныт. Мутлан, Бурятийыште да Удмуртийыште тыгайым вашлиймеке, шочмо йылме дене ышташ кумыл лектын», – палдарыш Евгения Кошкина.
О.МОШКИНА
