Ижевскыште СМИ-влаклан увертарыме «Смиротворец» всероссийский конкурсын региональный этапше иктешлалтын.
Чылаже тушко Юл федерал округын 200 СМИ-ж гыч 948 паша пурен. Республикысе Марий тӱвыра рӱдер конкурслан «Шорыкйол», «Семык», «Агавайрем» марий кечышот-йӱла пайрем-влак нерген фильм-влак циклым темлен да «Интернет» номинацийыште кумшо верым сеҥен налын. Тӱвыра рӱдерын директоржо Наталья Пушкинан вуйлатыме творческий группын режиссёржо Вера Горохова, операторжо-влак Николай Азиков ден Сергей Мамаев лийыныт.
Ты конкурсын « Радио» номинацийыштыже тыгак «Марий Эл» ГТРК-н журналистше Алевтина Кузнецова ойыртемалтын. Тудын ямдылыме «Кугезе сугынь» радиопередачыже икымше вер дене палемдалтын.
С.НОСОВА
