ОБРАЗОВАНИЙ ШИНЧЫМАШ КУГОРНЫШТО

Иктышт – Кавказыште, весышт – Москваште

Марий кугыжаныш университетын «Воскресение» кычалше студент отрядшын еҥже-влак Пётр Бусыгин, Алексей Моисеев, Юрий Иванов, Наталья Титова да Александра Бусыгина 22 июль гыч 9 август марте Кабардино-Балкарий Республикыште эртыше «Заоблачный фронт – 2021» военно-исторический фестивальыште улыт.

Кугу Отечественный сарыште Сеҥымашлан 80 ий, Кавказым кучедал сеҥен налмылан 78 ий теммылан пӧлеклалтше кугу экспедиций уло Россий гыч 50 кычалшым, реконструкторым иктеш чумырен.

24 июльышто «Воскресение» Маруханский перевалыш тарванен, тушто нуно колышо салтак-влакын капыштым кычалаш палемденыт. Ушештарена, Кугу Отечественный сар годым Кавказ верч кучедалме годым тыште неле бой-влак каеныт.

А теве студент отрядын моло еҥже да университетын аспирантше-влак Анастасия Ладина, Анастасия Иванова, Николай Мизгирёв, Марий Курбаш да Евгения Софина 20-23 июльышто Россий Федерацийын, тыгак Москва областьын Рӱдӧ кугыжаныш архивлаштыже пашам ыштеныт.

Нуно Кугу Отечественный сарыште оккупироватлыме кундемлаште фашист-влакын янлык койышыштым почын пуышо материалым шымленыт. Варажым ӱдыр-рвезе-влакын пашашт «Без срока давности» 23 томан документ сборникыш пурталтеш. «Мемнан тӱҥ задаче тыгай лийын: сборникыш пурышаш именной указательым ышташ. Чылаже 164 документлан анализым ыштенна, кажныштыже оккупаций режимыш логалшым, тудым ужшым кычалынна. Тушто предатель-влакын лӱмыштымат вашлийынна, – ойла Анастасия Ладина. – Вара кызытсе жаплан келышын спискым ыштенна, варажым нуным районласе администрацийыш пуат».

Тидын деч посна студент отрядын боецше-влаклан Хабаровский да Токийский дела дене материалым шымлаш йӧн лийын.

                                                                                                        Г.КОЖЕВНИКОВА

Опубликовать в Одноклассники

Добавить комментарий