Марий Элын Тазалыкым аралыме министерствыжын увертарымыж почеш, таче кечылан, 5 апрельлан, Йошкар-Оласе больницын инфекционный отделенийыштыже 23 пациент эмлалтеш. У коронавирус инфекций дене черланымым тымарте каласыме ныл еҥланак веле пеҥгыдемдыме. Ик пациент неле состоянийыште, тудо шодыжым искусственно вентилироватлыше респиратор полшымо дене шӱла.
Йоча республиканский клинический больницын коронавирус инфекциян пациент-шамычым эмлыме отделенийышкыже вич йочам пыштыме. Ныл пациентын состоянийже «нелылыкын куштылго йыжыҥыштыже» семын аклалтеш, иктын – «кокла йыжыҥыште».
Звенигово районысо рӱдӧ больницын коронавирус инфекциян черле-шамычым эмлыме отделенийыштыже ик пациент эмлалтеш.
М.ИВАНОВА
