МАРИЙ ТӰНЯ

Икоян лияш полшышо шонымаш

Кугу Соказа ял шотан илемыш пурышо Тӧргымдӱр ялыште верысе темлымаш-влакым илышыш шыҥдараш полшышо программе дене тӱвыра да спорт паркым ыштеныт да тудым торжественно почыныт.

Тушто ынде калыклан пайдалын каналташ шуко мо уло: куржталаш келыштарыме корно, стадион, йоча да ий площадке-влак. Концертым, моло мероприятийым эртараш сценым, ончаш толшылан шуко олымбалым ыштыме. Паркым печен налме, садерым шындыме.

Верысе чолга еҥ Сергей Байназовын ойлымыж почеш, тыште илыше марий калык шке илышыжым шкеак тӱзаташ тырша, икте-весылан полшен ила, йӱлам арален да шуен толеш, икшыве-влакым спортлан шӱмаҥда. Торгым эҥер Мишкан районышто гына 20 утла ялым уша, тыгак Пӱрӧ ден Бурай районласымат авалта. Парк олмым тӱзаташ темлымашым «Виче марий» калыкле-тӱвыра автономийын активистше-влак ыштеныт. Вуйлатышыже — Дмитрий Ибашев, полышкалышыже-влак Сергей Байназов ден Вячеслав Сабиров улыт. Шке жапыштыже стадион олмышто тыгак тӱшкан каненыт, тӱрло мероприятийым эртареныт. Но индешлымше ийлаште тудо шӱкшудо дене кушкын шогалын. Паркым тӱзатыме пашаш уло ял калык ушнен. А пырля ыштыме сомыл эре тӱвыргӧ лектышым пуа. С.Байназов верысе администраций вуйлатыше Станислав Сергеевын чолгалыкшым палемдыш, Мишкан район администраций вуйлатыше Павел Трапезниковын полышыжлан тауштыш.

Паркым ноябрь мучаште почмо кече кугу ял пайремыш савырнен. Бирск, Уфа олала, Мишкан села гыч вуйлатыше, депутат-влак саламлаш толыныт. Программыште школ тунемше-влак коклаште куржталтмаш эстафет, концерт, пырля мурен-куштымаш, ӱстел сий кочкыш лийыныт…

Концертыште эн ончыч Сергей Байназов шкежак мурен-куштен, гармоньым шоктен. «Мый уже историйыш пурышым. 2 ий ончыч тыгай парк лийын шуэш манын, нигӧ шоненат огыл. Ынде саклен гына мошташ кӱлеш, тек тыште шуко-шуко пайрем, таҥасымаш эртат. «Келшымаште – вий» манме девиз дене умбакыжат шуко сай пашам ышташ пӱйырыжӧ. А паша шуко: школышто, клубышто олмыктымо сомылым ворандарыман. Тыгай программе почеш шуктымо паша ял калыклан икоян лияш полша», – сералтен тудо мыланна.

С.НОСОВА

Опубликовать в Одноклассники

Добавить комментарий