Мут — делегатлан
Михаил Асессоров, Карелий Республик, Петрозаводск ола, «Марийцы Карелии» мер организаций вуйлатыше:
— Эн тӱҥ йодыш шке коклаштына икойыш шуын моштымо дене кылдалтын. Погынышто ме марий мер толкыным вияҥдыме шотышто, кажне организацийын шонымашыжым шотыш налын, стратегийым палемдышаш улына. Тидын годым марий мер толкынын эрыкан улмыжым арален кодашак кӱлеш.
Марий автномийын лӱмгечыжым палемдыме идалыкыште калыкнан кугыжаныш статусан улмыжым мондышаш огынал. Ты статусшым республик деч ӧрдыжтат пеҥгыдемден толаш тыршышаш улына. Но республик кӧргыштыжат марий-влак шкештат икоян да виян лийын моштышаш улыт. Тидыже мыланна, ӧрдыжтӧ илыше марий-шамычлан, кугу эҥертыш лиеш ыле. Тидат мыланна шкенан кундемыште туп огыл калык семын ишыктылаш тӧчышӧ-шамычлан мер ден социальный илышыште шкенан рольнам вияҥден да пеҥгыдемден толаш кумылаҥдаш тӱҥалеш.
Мый шке велым кажне ийын Марий Элыште почмо диалог семын регионысо мер ушем-влакын, тыгак Российысе тӱрлӧ регионышто пашам ыштыше калыкле-тӱвыра автономий-влакын еҥыштлан семинарым эртараш темлем. Молан манаш гын тыге пырля — пырля погынымаш республикыште мо ышталтме нерген пален налаш, тидын гоч паша планнам саемдаш, опытна дене палдараш, пӱсӧ йодыш-влакым каҥашаш сай йӧным почеш ыле. Поснак мер организаций вуйлатыше-шамычлан тидыже моткоч пайдале, кеч ялысылан, кеч оласылан.
Коммерческий огыл организаций-влакым чумырен, нунын пашаштым ворандарен, виктарен моштышо специалист-влак Марий республикыштыжат шагал улыт, мом тугеже ойлаш вес регионла нерген? Вес кундемыште илыше марий-влаклан тугакшат шке калыкын культуржым, йылмыжым, йӱлажым арален кодымо шотышто пашам вораҥдарен колташ нелырак. Компьютер технологий шотышто вашталтыш-влакланат эҥерташ тунемаш кӱлеш. Тунам вашкылым ышташат куштылгырак лиеш. Тыгак технический, моло тӱрлӧ отрасльлан специалист-влакым куштымо шотышто, поснак марий самырык-влак коклаште, ончыкылык ныл ийлан посна программым ыштыман. Тыште грант полышлан эҥертыме шотышто шоналташ темлем.
Ты черетан погынышто ме шкенан лушкыдо велнамат рашемдышаш да вияҥден колташ кӱлмӧ нерген раш корным палемдышаш улына.
С.НОСОВА
