21 август гыч 1 сентябрь марте Китайыште шахмат дене 8, 10, 12 ияш спортсмен-влак коклаште тӱнямбал первенстве эртен. Марий Эл гыч Российын сборный командыштыже улшо Максим Волков уш-акылжым терген, кандашымше верым налын.
Тений рвезе 12 ияш марте спортсмен-влак коклаште таҥасен. Икымше турышто землякна Тайланд гыч соперникшым сеҥен. Кокымшышто – Гонконг гыч. Чылаже 11 турым эртен, спортсмен куд вашлиймашым сеҥен, кумытышто ничьям ыштен, кок матчым модын колтен. Тыге 7,5 очко дене кандашымше верыш лектын. Луымшо тур марте медальланат ӱшан лийын, но… Чылажымат Россий гычак соперникше дене вашлиймаш иктешлен. Артём Пингиным Максим сайын пален. Тудыжо ош фигур дене модын, кандаш очком поген, нылымше верыш лектын.
Марий Эл шахмат федерацийын экс-президентше Андрей Темновын палемдымыж почеш, Китайыште Максим шкешотан подвигым ыштен. Тӱнямбал кӱкшытыштє шке ийготан 115 виян да уста шахматист-влак коклаште 10 эн тале радамыш логалын.
Е.ЭШКИНИНА.
