ШИНЧЫМАШ КУГОРНЫШТО ШКОЛ ЙОЛГОРНО

Идалыкын туныктышыжо — 2018: Нунын пашашт ик эн кӱлешан

Кажне ийын апрель мучаште Марий Элын туныктышыжо-влаклан республикысе профессионал конкурс эртаралтеш. Тений тудо Йошкар-Оласе 11-ше №-ан лицейыште 24-27 апрельыште лийын. 

Эн ончыч туныктышо-влакым Марий Эл правительстве председательын икымше алмаштышыже  М.Васютин саламлен. Варажым педагог лӱмеш ятыр поро мут йоҥгалтын, тиде профессийын ик эн кӱлешан улмыж нерген ойленыт. Туныктышо кажне кечын тунемше, ача-ава, пӱтынь калык ончылно экзаменым куча маншат лийын. Тидын дене келшыде ок лий. Садланак педагог эре тунемеш, шуаралтеш, ик верыште огеш шого, уым кычалын, ончыко кая.

Икымше кечын туныктышо-влак тӱрлӧ таҥасымаште усталыкыштым ончыктеныт, педагогике брифингыште, методике семинарыште, мастер-класслаште лийыныт. Кокымшо, кумшо кечын почылтмо урок  ден занятийым эртареныт.

Жюри сеҥыше-влакын лӱмыштым мучаш марте ойлен огыл. Эн ончыч финалист-влак дене палдареныт, кажне конкурсантлан дипломым, шергакан пӧлекым кучыктеныт.

 «Марий йылмым эн сайын туныктышо-2018» конкурсышто Йошкар-Оласе 7-ше №-ан школышто тӱҥалтыш  класслаште да 11№ лицейыште марий йылмым туныктышо Ирина Закиева сеҥен. «Марий Элын эн сай воспитательже-2018» номинацийыште Йошкар-Оласе 37-ше №-ан йочасадын воспитательже Татьяна Дружинина ойыртемалтын. «Идалыкын туныктышыжо-2018» лӱмым Медведево посёлкысо 2-шо №-ан школышто тӱҥалтыш класслаште туныктышо Татьяна Анисимова налын.

Сеҥыше-влакын лӱмыштым палемдыме годым уло зал рӱжге кычкырен. Кажныжат нунын дене пырля куанен, вет ныл кече жапыште туныктышо-шамыч йолташыш савырненыт, пырля тургыжланеныт, икте-весылан эҥертеныт, ваш-ваш лыпландареныт. Республикыште сеҥыше-влакым Россий кӱкшытан конкурс вуча.

Л.ШАБДАРОВА.
Д.Речкинын фотожо.

Опубликовать в Одноклассники

Добавить комментарий