Чодыра озанлык пашаеҥ-влакын профессиональный пайремышт тений 15 сентябрьлан логалеш. Тудын вашеш Марий Элын Пӱртӱс поянлык, экологий да йырым-йырысе средам аралыме шотышто министерствыже Юл кундем кугыжаныш технологий университет, республикысе чодыра отрасль пашаеҥ-влакын профсоюз рескомышт, Республикысе чодыра дене пайдаланыше-влакын ушемышт дене пырля чодыра отрасльыште тыршыше-влакын профессиональный мастарлыкыштым тергыме конкурсым эртарен.
20 командын участникше-влак чодыра участке-влакын арендаторышт, лесничестве пашаеҥ-влак лийыныт. Каласен кодыман, тыгай конкурс ий гыч ийыш эртаралтеш. Тудо республикысе чодыра отрасльыште тыршыше-влакын ик эн вучымо да пырля вашлийме мероприятийышкышт савырнен. Тений участник-влак чодыра пожарым йӧртымаште, оринтированийыште, бензопила чепым вашталтымаште, тыгак пушеҥгым йӧрыктымаште да тудым комбинированно пӱчкедымаште таҥасеныт.
Чодыра пожарым йӧртымаште да ориентированийыште эн сай лектышыш «Мартрейд» ООО-н пашаеҥже-влак Ринат Касимов ден Олег Янцуков шуыныт. Чепым вашталтымаште да пушенгым йӧрыктен пӱчмаште ПГТУ-н тунемме-опытный лесхозшын командыжын участникше Андрей Кренев ойыртемалтын.
А команде-влак коклаште ынде кокымшо ий почела сеҥыше семын «Мартрэйд» ООО-н командыже палемдалтын. Кокымшо верыш Килемар лесничествын, кумшыш Параньга лесничествын командышт лектыныт.
Сеҥыше-влакым Марий Элын пӱртӱс поянлык, экологий да йырым-йырысе средам аралыме шотышто министр Алексей Кислев палемден.
Конкурс мучаште «Хускварна» ООО-н специалистше-влак, шке продукцийыштлан эҥертен, чодыра пашаште у технологийым да йӧным кучылтмо шотышто туныктымо семинарым эртареныт.
С.НОСОВА
Снимкылаште: конкурс годым.
