Школышто тунемше-влаклан тыгай лӱман конкурсым Марий кугыжаныш университетын руш йылме, литератур да журналистке кафедрыже ден «Марийская правда» газет увертареныт.
Тудын тӱҥ шонымашыже – самырык тукымым ончыкыжым журналистике сферыште пашам ышташ кумылаҥдаш.
Конкурсыш республикысе школлаште 9-ше, 10-шо да 11-ше класслаште тунемше ӱдыр-рвезе-влак ушнен кертыт. Участник тӱрлӧ жанр дене рушла але марла возымо материалым ямдылышаш, тыгай теме-влакым темлыме:
1.Социальный оптимизм: шкан да обществылан кузе ӱшанаш.
2.Кузе йӧратыме сомыл профессийш савырна.
3.Мый могай школышто тунемнем.
Материалын вуймутшо келшыше веле огыл, эше оҥай да ойыртемалтше лийшаш.
Конкурсыш тыгак 3 минут деч шуко огыл жапан видеороликым, слайд-шоум колташ лиеш
Участник-влакым икмыняр этап вуча:
1-ше (23 апрель гыч 14 май марте) – йодмашым да пашам пуэн шуктыман;
2-шо (17-28 май) – материаллан акым пуат, конкурсын финалышкыже ӱжмашым колтат;
3-шо этап – сеҥыше-влакым саламлымаш, тудо 24-28 майыште Марий кугыжаныш университетыште лиеш.
Пашам да йодмашым электрон почто дене колтыман: konkurs_jur@.ru , «Журналист лий-2021» конкурсыш» палемдыман. Журналистике кафедрын телефонжо: 8(8362)68-80-00.
Г.КОЖЕВНИКОВА
