УВЕР ЙОГЫН

Жапыштыже ыштен шуктыман

РФ-н чоҥымо паша да илыме вер ден коммунал озанлык министрже Владимир Якушев ден Марий Эл вуйлатыше Александр Евстифеевын вашлиймашышт лийын.

Нуно «Илыме вер да оласе кумдык» нацпроектым илышыш шыҥдарыме, республикыште илыме верым чоҥымо пашам вияҥдыме йодыш-влакым каҥашеныт.

Александр Евстифеев министрым Марий Элыште илышыш пуртымо проект-влак дене палдарен. Тудо социально-экономически вияҥме индивидуальный программым шыҥдараш полшымылан тауштен да умбакыжат республик дене тыгак пашам ышташ йодын, поснак Волжск олаште вӱд пуч – канализацийым уэмдыме шотышто. Вет тиде пашан акше 1,2 млрд. утла теҥгешке шуэш. Но республикын бюджетше гыч гына тыгай кугыт оксам ойыраш йӧн уке.

– Мом ышташ лиеш, ончалына. Йӧным муаш тыршена, – каласен Владимир Якушев.

* * *

Марий Эл вуйлатыше Александр Евстифеев республикын правительстве пӧртыштыжӧ РФ-н чоҥымо паша да илыме вер ден коммунал озанлык министрже Владимир Якушевын эртарыме совещанийышкыже ушнен.

Тудын участникше-влак республикын социально-экономически вияҥмаш индивидуальный программыжым да нацпроект-влакым илышыш пуртымо нерген мутланеныт.

Министр палемден: Марий Элым социально-экономически вияҥдыме индивидуальный программым кужу жап ямдылыме да кажне пунктшым радамлын каҥашыме деч вара веле пеҥгыдемдыме.

– Программын мероприятийже-влакым икмыняр гана уэш ончен лекме, но нуным вараже Россий правительствыште сайлан шотленыт. Тидыже моткочак кӱлешан, — ойлен Владимир Якушев.

Тыгак палемден:

– Программым илышыш шыҥдарымаште ме куратор семын полшаш ямде улына. Мом идалык мучаш марте ыштен шуктыман, тидлан ойыралтше оксамат тымарте кучылтман. Могай объектым чоҥыман, нуным пашашке колтыман. Тоштемше илыме верла гыч мыняр еҥым вес вере илаш кусарыман, тидымат жапыштыже ыштыман. Оласе йӧнан кумдык шотыштат паша палемдыме сроклан мучашлалтшаш.

Опубликовать в Одноклассники

Добавить комментарий