манеш Морко район Кокласола связь отделений вуйлатыше А.Алексеев.
Тиде отделенийым ынде визымше ий А.Алексеев вуйлата. Яллашке газет ден журналым, серышым, тыгак пенсионер-шамычлан пенсийым, пособийым кум почтальонко нумалеш. О.Алексеева, Н.Васильева, Г.Александрова ял калыкын эреак вучымо унаже улыт. Нуно Овдасола, Кожлаер, Йӱлесола, Йошкарэҥер, Кокласола яллашке игечым ончыде вашкат, лудшо-влакым куандараш тыршат.
— Отделенийышкына подписке почеш кумло кандаш «Марий Эл» ден кудло экземпляр «Сурт-пече» газет толеш, — каласкала Алексей Юрьевич. – Шочмо йылме дене лудшо-влак кунар-гынат ешаралтыт. Подписке деч посна кок газетшат эше ужалымашке коло экземпляр дене толеш. «Сурт-пече» кужун ок кий, вигак налын пытарат. Оксам тӱлен вигак налше-влак поснак шукын улыт. Икмынярынже вара подпискымат ышташ кумылаҥыт.
Связь отделений ончычшо Изи Шӱргыштат лийын, но варажым тудым петыреныт. Канторъял отделенийыште ныл почтальонко тырша. Но тыште кызытеш вуйлатышым муын огыт керт, сандене Алексей Юрьевичлан тыштат начальник семын тыршаш перна.
Республикысе связь отделенийлаште лийме годым тыгай сӱрет шинчалан перныш: нуно ятырынже тошто пу пӧртлаште, пу дене олтен ырыктыме коҥган оралтыште, верланеныт. Тидыже кунар-гынат кумылым волта, вет тыште паша условийым саемдыме нерген мутат лектын ок керт. Тыгай оралтыштак верланен Кокласола отделений.
В.СМОЛЕНЦЕВ
Авторын фотожо
