УВЕР ЙОГЫН

Жаплан – онлайн йӧн дене

Коронавирус шарлымылан кӧра театр-влакын онлайн йӧн дене спектакльым ончыктымышт нерген кодшо гана газетыште лудынам ыле. Тиддеч посна эше иктаж культур учреждений иктаж-мом темла мо?

А.Павлова

Параньга район.

— Тиде йодышлан республикысе Марий тӱвыра рӱдерыште тыгерак вашештышт:
— Коронавирус шарлен кертмым чараш манын, ик жап калыклан мӧҥгышто шинчаш перна. Тиде жаплан Марий тӱвыра рӱдер тӱвыра да уш-акылым пойдараш келшен толшо тӱрлӧ мероприятийым онлайн йӧн дене темла.
Кажне кушкыжмын 18 шагатлан «У муро» вокал студий вуйлатыше Геннадий Григорьев «Бард касыш» ӱжеш гын, «Юкече» йоча студийын вуйлатышыже Светлана Яндукова изарня еда 16 шагатлан «Пырля мураш тунемына» занятийым эртара. А шочмын да вӱргечын – «Марла ойлаш тунемына» мультипликаций урокын кечыже. Шуматкечын рӱдерын методистше Надежда Николаева марий калыкым национальный кочкышым ямдылаш туныкта гын, рушарня еда рӱдерын методистше Эльвира Петрова гармонь семже почеш мураш да кушташ ӱжеш.
Икманаш, мӧҥгыштӧ лийме годым кажне еҥ жапым пайдалын эртарышаш. А Марий тӱвыра рӱдерын темлыме мероприятийже-влак нерген уверым мемнан сайтыште (http://mari-centr.ru) лудаш лиеш.

А.БАЙКОВА

Опубликовать в Одноклассники

Добавить комментарий