АКЦИЙ КОНКУРСЫ

Еш йӱлам аралымылан – пӧлек

«Идалыкын ешыже» всероссийский конкурсын иктешлымашыже эше кеҥежымак пале лийын. Тушто Марий Эл гыч кок еш сеҥышыш лектын.

Нуным да ойыртемалтше моло ешым Москваште Кугыжаныш Кремль дворецыште саламлышаш улыт ыле. Но пандемийлан кӧра тиде лийын огыл.

Сандене диплом ден пӧлекым регионлашке колтеныт. Ик ешыжым, Волжский район гыч Кудревцевмытым, «Еш – йӱлам аралыше» номинацийыште сеҥымышт дене эртыше кечылаште Марий Элын социальный вияҥмаш министрже Марина Островская ден Волжский район администраций вуйлатышын алмаштышыже Сергей Сычев саламлаш миеныт да диплом ден ноутбукым кучыктеныт.

Алексей Леонидович ден Екатерина Арсентьевна вич йочам: ныл эргым да ик ӱдырым — ончен куштат. Нуно икшывыштым шке калык йӱлаштлан да тӱвыраштлан шӱмаҥдат. Кудрявцевмыт путешествийыш кошташ моткоч йӧратат. Кеч-кушко каят гынат, тоштерлашке, черке ден монастырьлашке пурен лекташ, шнуй верлам ончен савырнаш, марий кундемыште улшо памятник-шамыч дене палыме лияш тыршат. Тыгак тиде еш шке ялыштын, ял шотан илемыштын, районыштын мер илышышкыштат чолган ушнат.

Сеҥышыш лекше вес ешлан – Шернур район гыч Малининмыт ешлан – пӧлекым лишыл кечылаште кучыктат.

Л.КАМАЛЕТДИНОВА

Опубликовать в Одноклассники

Добавить комментарий